Presion di temanan social riba politiconan no por bira peligro
*Peligro poblacion excesivo pa salud humano, a wordo proba
*Un maximo pa poblacion ta determina sobrevivencia di desastre
ORANJESTAD(AAN)—“”Cu un pais democratico mester brinda su comunidad, e assistencia necesario den necesidad indispensabel cu un ciudadano mes no por carga, ta algo cu a wordo hancra den leynan di Aruba cu conoce un base legal, cu ta rechaza condicionnan inhumano manera otro pais conoce.
Sinembargo, tin factornan sumamente importante cu den tur sector di comunidad, mester wordo tene na consideracion.”
Esaki ta reaccion cu DIARIO ta ricidi di expertonan riba topiconan cu mester di analisis profundo, pa evita cu Aruba ta crea un problema pa mucho mas tanto problema, a base di presion y exigencianan inaceptabel.
DIARIO na varios ocasion a atende e tema di vivienda, cu ta preocupacion tambe di Gobierno, manera por comprende for di informacionnan di encargo cu a wordo duna dor di Prome Ministro Evelyn Wever-Croes, pa yega na alternativanan pa vivienda social.
Ora papia di “social”semper tin un parti peligroso ya cu hopi bez ta wordo pensa, cu tarea di un Gobierno ta, deshaci di responsabilidad cu ciudadanonan mester carga pa nan propio persona y pa nan familia.
Pa atende cu e topico aki tambe, mester bolbe na conceptonan di Arubianismo cu conoce un grado halto di responsabilidad propio, cu tabata manifesta su mes entre otro den e preparacionnan cu segun tradicion, un matrimonio como base importante di expansion di poblacion tabata conoce.
Familiares y amigo tabata contribui den construccion di un cas basico pa un pareha nobo.
Nos no ta bolbe den tur loke na tanto ocasion nos a presenta, pero aki ta mira e principio Arubano cu ta honra e importancia di e sentido di hogar, cas, pa un famia.
Mester aplaudi e hecho cu Gobierno a cuminsa yuda cu construccion di cas pa soluciona e falta di vivienda, cu lamentablemente tambe a crea un dependencia den hopi caso, di loke Gobierno (Pueblo pagador di Belasting) ta ofrece.
Vivienda social ta nifica, cu comunidad y gobierno ta brinda asistencia social den forma di un cas pa persona cu no por paga huur na un comunidad, cu a wordo afecta dor di cambio pa falta di bon gobernacion.
Manera semper DIARIO a bisa, e hecho cu na un forma explosivo na 1986 a cuminsa importa proyecto (pues trabou) pa despues mira cuanto trahador tin pa traha, loke a causa e problema si sobrepopulacion, no por sigui desaroya, pero mester stop awor.
Aruba como comunidad mester di espacio pa cada habitante, mas ainda si tuma nota di rapportnan medico, cu ta ilustra cuanto persona ta sufri di problema di salud debi na e forma cu nan ta biba.
Kico ta cas den tempo moderno, por mira den e edificionan di cien piso rond mundo.
Suelo di Aruba ta permiti e construccionnan aki na Aruba? Con halto un edificio por ta na Aruba? Por yena Aruba cu edificio halto si no tin mas espacio pa e casnan individual?
Rapportnan di cientificonan ta mustra, cuanto persona ta sufri di enfermedadnan fisico y mental pa motido di e edificionan den cual nan mester biba, cu ta causa depresion, tension, enfermedadnan cu ta conduci na presion di sanger, peliger pa bira diabetico pero tambe brotenan di enfermedadnan cu ta mas conoci den e tipo di viviendanan aki.
Aruba mester dicidi cuanto construccion di tur tipo e por acomoda, mescos cu ta e caso cu tur pais na mundo, cu conoce e problema di vivienda cu durante e pandemia di Covid-19 a duna prueba di ta determinante den sobrevivencia of morto.
Pa sirbi interes di un pais, mester informa e pais debidamente.
E structura di Aruba ta exigi pa tin zona cu no ta expone na peliger natural, di cual Aruba a scapa na tanto ocasion pero no cu e siguransa cu nunca nada ta pasa.
Aruba mester di zonanan di refugio pa calamidad, pa guera, pa tur loke por presenta segun historia humano ta trece dilanti.
Casnan construi na costa di Aruba, ta peligroso na cierto momento. Con ta haci cu personanan cu mester wordo evacua na cierto momento?
Esaki ta e planificacion importante pa Aruba cu tur hende mester comprende y cu no por bira presion politico pa ningun Gobierno.
Cu prueba di investigacionnan den man, semper DIARIO a mustra, cu mester dicidi cuanto habitante Aruba por conoce segun e responsabilidad cu e ta asumi ora solo ta briya pero tambe (manera nos ta spera cu nunca) ora peliger bati na porta.
Uno di e resultadonan mas importante di Covid-19, tabata e informacionnan cu el a entrega na mundo, cu a pensa cu nunca nada ta pasa.
Mester uza e cifranan aki pa cu asistencia di sistemanan moderno importante manera Inteligencia Artificial, haci calculacionnan tocante e espacio cu Aruba ta ofrece pa crecemento, pa evita e crecemento di peliger pa felicidad, salud y bida di hende.
