Geoffrey Wever:
ORANJESTAD (AAN): Durante un conferencia di prensa dialuna mainta, Minister di Asuntonan Economico, Geoffrey Wever, ta anuncia cu e Aruba Investment Summit 2024 lo tuma lugar na Den Haag, Hulanda, riba dia 21 di maart proximo. E obhetivo principal di e summit ta pa presenta Aruba como e destinacion di inversion principal den Caribe y pa destaca e oportunidadnan cu nos isla tin pa ofrece.
Minister Wever a subraya e importancia di promociona Aruba como un destinacion di inversion atractivo, y a gradici tur esnan involucra pa nan esfuersonan pa haci e Aruba Investment Summit 2024 un realidad. AIS 2024 ta un esfuerso conhunto entre e Representacion di Hulanda na Aruba, VNO, Camera di Comercio di Aruba, Aruba Huis, y organisa pa unidad ARINA di Departamento di Asuntonan Economico.
E summit lo inclui discusionnan riba oportunidadnan di inversion den area di sostenibilidad, cual riba su mes ta transcede diferente industria. Tambe lo focus riba oportunidadnan pa Oranjestad y San Nicolas manera gastronomia, real estate, entertenimiento y mas.
Promocion extensivo pa e evento lo ser haci riba diferente plataforma di media, cu enfoke special riba inversionista potencial for di Hulanda y cercania. Organisacion y maneho di registracionnan pa e evento ta sera maneha pa ARINA. Lo presenta oportunidad pa comerciante y interesadonan participa tanto cara-a-cara, como tambe e opcion pa atende virtualmente via Microsoft Teams.
Pa mas informacion y detayenan tocante e Aruba Investment Summit 2024, por tuma contacto cu e Ministerio di Asuntonan Economico of bishita nan website oficial di www.investinaruba.com
Minister Geoffrey Wever kier a gradici tur esnan cu ta bai haci e Aruba Investment Summit 2024 un realidad. Sr. Vincent Storimans, Plaatsvervangend Vertegenwoordiger van Nederland in Aruba (VNO); Sr. Diederik Kemmerling, presidente di Camara di Comercio di Aruba; Sr. Ady Thijsen, nos Minister Plenipotenciario na Den Haag y e ekipo di Aruba Huis; Sra. Maria Pita-Dijkhoff y, directora di Departamento di Asuntonan Economico y su team di ARINA, Zuleika Quant y Bryan Lenzinger.
