Na ex La Fama lo bin un rotonde - ORANJESTAD (AAN): Director di e Departamento di Obranan Publico (DOW), Ing. Marlon Croes, a duna di conoce durante un presentacion di e proyecto Oranjestad, cu e 'driver' pa e remodelacion di Caya Grandi ta vivienda den caya.
El a indica tambe cu tin algun edificio cu ta wordo uza como negoshi abao y na halto como 'warehouse'. Si bay dek den decadanan 50-60, esey tabata negoshinan abao y vivienda na halto.
Croes a bisa cu mester cambia e modelo di negoshi aki pa por acomoda negoshinan abao y vivienda na halto atrobe.
ROTONDE NOBO
Banda di esaki tin cu bay mehora trafico. El a remarca cu den e ultimo lunanan, e luznan di trafico di Elmar, La Fama y ex BGD a duna hopi dolor di cabez.
Recientemente a saca un conseho pa minister riba cual e tin cu duna aprobacion pa reconstrui e crusadanan aki.
Na ex La Fama, den añanan 70 eynan tabata tin un rotonde y segun Marlon Croes, e ta kere cu lo bay den e direccion ey bek.
MERCADO ORANJESTAD
Ta papia hopi di infrastructura, pero un parti cu ta bay pusha tambe ta e parti di evento. Akinan ta papia di e 'Aruba Outdoor Economy Amenities' cu ta buscando.
Gobierno tin den plan un proyecto cu yama e mercado di Oranjestad y kier 'kick-off' pronto unda cu tur diadomingo of un bes pa luna ta bay organisa mercado pa e cunukeronan por bende nan productonan cu nan ta cosecha na Aruba. Tambe e piscadornan, esnan cu ta traha cuminda local y otro eventonan unda por trece actividadnan den centro di Oranjestad, a duna di conoce.
E director di DOW a finalisa bisando cu e intension ta cu nan a inicia den Wilhelminastraat, Caya Grandi y despues Welcome Plaza, Plaza Betico y Plaza Simon Bolivar.
Cu e sinergia entre sector publico y priva kier duna contenido na e proyecto aki y ademas di esey bin cu incentivonan y eventonan pa yuda atrae caya. Pa esaki mester di sector priva pa capitalisa e inversionnan cu gobierno ta bay haci pa por sigui dilanti y pa haya un ciudad bek vibrante, a expresa.
