Vision di Gobierno pa Port City bira area residencial pa local

Prome Minister Mike Eman a bishita Brandevoort de Veste

ORANJESTAD (AAN): Brandevoort de Veste ta un bunita inspiracion pa desaroyo di un area residencial nobo pa Aruba. Prome Minister mr. Mike Eman, a busca contacto cu esnan responsabel cu a crea e bario aki, y a haci un bishita personal pa mira e proyecto aki. Brandevoort de Veste ta un bario relativamente nobo cu ta situa na Helmond y a keda completa na 2005. E bario aki ta consisti di casnan cu ta construi den un patronchi no linear y ta crea clusters di casnan cu ta rondona areanan berde y sitionan comun.

Gabinete AVP-Futuro tin plan pa cambia e proyecto di Port City riba e tereno grandi di Waf na Oranjestad, den un Port Town pa nos hendenan local y no condominio pa hendenan di afo. Ta trata di casnan di un of dos piso den cual e hendenan ta bin hunto, tin un scol, parkenan pa recrea, un cantidad di mata cu ta duna sombra etc. E concepto ta trece comunidad hunto.

Prome Minister Eman ta spera di pronto por trece e grupo di desaroyadornan aki Aruba pa hunto cu arkitectonan local y eventualmente un of mas universidad, desaroya e diseño di Port Town. E diseño aki ta duna e bario un sentido comunitario hopi intensivo. Port Town lo mester bira un proyecto pagabel pa nos hendenan di entrada mediano cu awo dificilmente por yega nan nan propio cas. Ademas lo inclui clausulanan den e contratonan cu ta prohibi e fenomeno di Airbnb.

Un otro area na Aruba na unda por ehecuta un proyecto similar ta e area di Sero Colorado, pa cual pronto lo extende un invitacion na e diseñadornan pa crea un concepto cu arkitectura local pero den mes estilo cu Brandevoor de Veste.

E escasez di vivienda ta haci cu Gobierno mester crea proyectonan relativamente rapido y exclusivamente pa e mercado local y pa uzo residencial y no Airbnb.