Ryan Maduro, Director General --- *Tambe introduci un nivel 5 cu ta e 'Associated Degree'
ORANJESTAD (AAN): Na Colegio EPI tabata tin un rueda di prensa unda Director General Ryan Maduro unda el a elabora ampliamente riba e declaracionnan di Minister di Enseñansa a haci caba den prensa tocante e proceso di innovacion y renobacion di e curriculum na Colegio EPI.
El a cuminsa bisando na Augustus 2022 lo ta e di 25 aña academico di nan apertura y nan tin plannan pa celebra esaki.
E proposito di EPI desde cu el a wordo lanta ta dos cos principal: e prome ta percura cu beroepsonderwijs (educacion profesional/vocacional) ta den linea cu e rekisitonan di e mercado laboral pasobra esey ta un di e esencia pakico EPI ta existi, a indica.
E otro proposito ta pa prepara e studiantenan pa un sociedad, pa 'fit' den dje y pa ta participativo, a agrega.
EPI su campus ta consisti di un tereno di 50 mil m2. E edificionan cu nan tin ta traha pa 1100 studiante. E facilidadnan cu tin construi ta di 15 mil m2. Tin 13 edificio y 10 trailer.
E cantidad di personal cu tin ta 140 docente y tin 65 personal di apoyo, a señala.
Maduro a sigui bisa cu pa 2021-2022 tabata tin 14 opleiding cu a draai di e 4 diferente units cu EPI tin.
Pa loke ta futuro, tin cu para keto na dje un rato. Nan vision ta pa crece te na 27 opleiding parti den e diferente 4 unitnan como tambe introduci un nivel 5 cu ta e 'Associated Degree'. Aworaki EPI tin un 'Associated Degree' na Sector Hospitalidad y Turismo, pero e idea ta pa bin c'un 'Associated Degree' pa cada un di e otro unitnan.
Ryan Maduro a indica cu esaki ta contribui na cu e studiante ta keda na Aruba, studia na Aruba y e ta studia su prome añanan di un HBO Opleiding y e ora e duna e potencial tambe di keda den e mercado laboral na Aruba tambe.
E cantidad di studiante ta rond di 2000. EPI a wordo construi pa 1100 studiante y aworaki ta trahando cu dobel di e capacidad na e momento aki.
Esaki ta un analisis, a bisa, cu e ta mustrando di 2006-2007, di e schooljaar te cu awor y ta mira cu desde 2014 en adelante, a cuminsa piek entre 1800 pa 2000 studiante y esey no a cambia, e Director General di Colegio EPI a duna di conoce.
