Dadou Croes
ORANJESTAD (AAN): Riba Diaranson e informe a drenta cu e conocido comerciante di hopi tempo, esta ‘Dadou Croes’ kende a bira amigo di tur cliente na Texas Furniture Store, a fayece inesperadamente.
E tabata e persona cu semper bo ta mire ta cana rond cu sonrisa den e famoso muebleria aki. Un persona cu curazon di oro, cu ta compronde tur loke e consumidor kier, y e tabata hasta ofrece sugerencia con pa decora bo cas, na un forma hopi agil y sigur profesional.
Paul R. Croes a nace na Aruba dia 24 di Juli 1954 pues tin 67 aña di edad. E tabata un persona hopi social, cu ta cera amistad rapido, y pesey e tabata wordo mira semper den Texas Furniture Store.
Pesey e tabata wordo hasta considera, cu Dadou ta e comerciante cu pueblo tabata stima inmensamente. Ultimo tempo e tabata yudando su sobrino den maneho di e empresa nobo ‘Cas di Max’ cu tambe a haya bon acogida den pueblo.
Pueblo awor ta tristo cu e noticia cu Dadou a bay laga nos. Pa tal motibo tur su clientenan ta manda palabra di condolencia na su pareha Irene. Condolencia na su tres yiunan Joanne, Elizabeth, y Marie Therese.
DIARIO tambe ta desea di uni cu e mensahe di pueblo, y expresa su mas profundo palabra di condolencia y forza na famia di Dadou Croes. Paz na su restonan.
