E ta Hefe di Redaccion di 1Almere:
ORANJESTAD: Vincent Smit, Hefe di Redaccion di 1Almere na Hulanda, lo ta un di e oradornan durante e di tres edicion di Caribbean Journalism Seminar, organiza pa Red Arubiano di Prensa Profesional (RAPP). E seminario combina cu un workshop, lo tuma luga di diabierna pa diadomingo e fin di siman aki riba e topico central AI and Innovations.
Den e seminario di awe nochi, Smit su presentacion lo enfoca riba “Vibecoden”, un manera cu periodistanan por crea diferente tools cu yudansa di inteligencia artificial, sin mester sa programa of “code”. Vincent lo splica con por pasa di un idea pa un tool cu ta funciona y cu por wordo crea den cinco minuut.
Segun Smit, inteligencia artificial ta permiti periodista duna instruccion na lenguahe normal pa crea tools cu antes tabata rekeri yudansa di un programador. Como ehempel, el a menciona cu ora un redaccion publica un articulo tocante impuesto, nan por crea un calculador na unda lector por calcula su propio impuesto.
Durante su presentacion, Smit lo splica con un periodista por pasa di un idea pa un solucion practico cu por facilita su trabao diario. Durante e workshop, participantenan lo haya oportunidad di aplica e conocemento y crea nan propio tools.
Smit ta enfatisa cu AI no mester wordo mira como reemplaso pa periodista, sino como un instrument pa haci e proceso di trabao mas eficiente.
E ta considera cu e toke humano, pensamento critico, investigacion y capacidad pa haci preguntanan critico lo sigui indispensabel den periodismo, mientras AI por yuda automatisa tareanan cu ta costa tempo.
E seminario ta tuma luga awe diabierna 25 di september di 6:30–8:30 PM na Impact Hub Aruba, na unda pa tres dia lo tin oradornan professional cu lo comparti nan conocemento riba e topico.
