ORANJESTAD (AAN): Via Zoom Meeting, Gobierno y Secretario di Estado Alexandra Van Huffelen a hiba combersacionnan principalmente riba e tema di abolicion di sclavitud.
Prome Minister Evelyn Wever-Croes a duna di conoce cu esaki ta un reunion regular cu ta tuma luga prome cu cada reunion di Conseho di Minister di Reino cu Secretario di Estado pa trata agenda di Aruba pero e biaha aki sinembargo no tawatin puntonan relevante riba agenda pa Aruba.
Durante e reunion, a elabora riba e tema di "slavernij verleden" na unda cu a duna señora Van Huffelen un splicacion di tur loke Aruba ta trahando riba dje pa otro siman. Prome Minister a indica cu e topico di historia di sclavitud na Aruba ta keda un topico di interes entre Aruba y Hulanda. Otro siman lo tin e actividad pa conmemora e di 160 aña di abolicion di sclavitud den Reino Hulandes. Esaki lo tuma luga dia 1 di juli proximo. Secretario di Estado Alexandra Van Huffelen lo ta na Aruba otro siman 4 di juli pa un bishita di trabou hopi cortico.
