ORANJESTAD (AAN): Siman pasa, e profesionalnan di NV Elmar a ehecuta algun trabao di mantenimento riba wayanan di voltahe halto.
Esaki a tuma lugar na Weg Fontein y vecindario, aki nan a reemplasa liñanan distribucion di coriente di tension halto. Tambe a haci trabaonan di mantencion pa reemplasa otro componentenan riba e grid di electricidad. Cu e trabaonan di mantenimento aki, nan ta haci e grid di electricidad mas duradero y stabil, pa asina bo por continua confia riba nos servicio.
Segun NV Elmar, recientemente tambe nan a reemplasa wayanan di tension halto den Moko y vecindario tambe. Pa realisa e trabaonan aki, tabata necesario pa interumpi servicio di coriente temporalmente, pa e siguridad di e empleadonan conoci como “lineman” y tecniconan di kabelnan subteraneo.
A ser splica cu e trabao di mantenimento aki tambe ta forma parti di e asina yama “meerjarenplan”, ademas di trabaonan di mantenimento riba instalacionnan den nan casitanan di transformator y substationnan.
E interupcionnan planea tabata necesario pa por realisa e trabaonan di manera adecua.
