No mira, no tende, no scucha pero hunga cientifico cu un peliger mortal - Ni laboratorionan mas avansa na mundo tin mas sabiduria cu Facebook - Un analisis di e forma con hende ta bende e esencia pa e yama su mes hende
ORANJESTAD(AAN)- Riba Diahuebs un yamada tras otro ta drenta. Habitantenan di cantidad di pais cu a bolbe na “normal” ta bati alarma. Hende cu a bay cu vacacion, a keda pega na nan destinacion. Mundo na careda atrobe pa e Coronavirus, un malesa mortal cu ta duna prueba cu algo serio a pasa cu hende.
Uno di e aspectonan mas importante pa analisa awe, ta hende como hende actualmente.
Cada dia hende ta avansa mas den su teorianan cu e kier yama sabiduria. Hende, cu hunto cu tres tipo di macaco grandi, tin e nomber cientifico di loke parce hende.
Den caso di hende ta papia di “homo sapiens”, cu mester ta e especie mas refina segun cierto teorianan cientifico riba origen di hende.
Hende mester ta capaz di uza su cabes y ta hustamente e aspecto aki, na 2020 cu pandemia di e coronavirus nobo, a bira mas discutibel.
Ora realisa con leu hende a yega, ta mira e hende cu supuestamente tur dia ta bira mas sabi y continuamente tin e necesidad pa splica otro hende con sabi e ta.
Si analisa e asunto bon, ta yega na conclusion cu enbes di registra avance, hende realmente a bay den reverse.
Hende a bira similar no na un macaco, pero na tres macaco cu no kier tende, no kier mira y no kier scucha pero si ta considera su mes super inteligente di un grado asina halto, cu hende ta subi Facebook, ta tweet, ta manda message, cu ta circula di un hende pa otro, cu ta “share” sin puntra su mes sikiera kico e ta share.
Na 2020, ora e Coronavirus nobo a presenta, e prome asunto cu el a cuestiona, kico a pasa cu sabiduria di hende.
Polis mester subi caya pa evita cu hende ta laga un virus pone fin na su bida y na bida di tur hende su e stima mas tanto, pasobra ora plama un virus e personanan mas na peliger, ta e personanan mas cerca, mas stima, mas importante den bida di e hende cu ta laga Covid-19 destrui mundo.
Ora analisa con bobedad a bira rey den mundo moderno, mester bay na mensahenan cu hende ta manda otro. Mensahenan cu a wordo introduci for di dia entre otro Facebook a nace, pero ainda ta wordo reparti dor di hende cu kier pa otro kere cu e ta sabi.
Riba Facebook, durante e ta “google” e hende ta bira dokter. E ta bira profesor. E ta bira cientifico cu tin mas conocemento cu tur cu a studia hunto.
Esaki ta e motibo cu awe mundo ta problema cu su mes y sigur cu e virus cu cada rato ta bira mas peligroso, pero no ta wordo acepta como peligroso pero tin hende asina bobo, cu hasta virus ta mas sabi cu nan.
Awe un mundo cu a cuminsa recupera, a bolbe na medida. Di rond mundo informacion a drenta di introduccion di Toque de Queda pero tambe e prome protestanan di personanan cu ta prefera di muri basta cu nan por sigui adora nan bobedad cu nan ta sconde for di frasenan cu nan a “download”.
Lamentablemente un virus ta sigui hari hende, Ta sigui mata hende, Ta sigui laga cantidad di hende cu un malesa pa resto di nan bida si nan sobrevivi.
Pero no papia di vacuna. Pasobra vacuna, segun e ola di hende sabi, a wordo inventa pa haci hende malo. Ta esey ta e motibo cu nan ta laga Covid-19 mata nan y nan sernan mas stima, nan amigonan.
E conclusion? Con bobo hende por bira? Con hende por yama su mes “homo sapiens” si un virus cu no por cana riba dos pia, ta destrui hende cu kier hunga macaco?
E conclusion? Un siglo pasa hende bobo, cu no tabata tin television, no tabata app, no tabata tin Facebook, y tabata kere cu ta dori ta “tweet” a pone un fin na e malesa Kabouter. Awe cu vacuna, hende ta sigui muri pero profetanan cu nunca a tende di scritura, profesornan cu nunca a habri un buki, cientificonan cu nunca a tende di laboratorio, y naturalmente caymannan cu solamente ta mira placa na boca di rio, ta duna prueba cu e chimpansee, e oerang-oetan, e gorrilla tin derecho di bira furioso si bisa cu e ta origen di hende, si mira kico hende ta permiti Covid-19 haci cu hende!
