ORANJESTAD (AAN): Un di e sugerencianan cu mas a resalta durante e reunionnan entre stakeholders y Formador di Gobierno tabata relaciona cu cambionan den diferente ley.
Evelyn Wever-Croes, den conferencia di prensa a indica cu gran mayoria di e stakeholdernan ta indica cu mester cambia ley pa resolve algun di e problemanan cu tin na Aruba.
Na Aruba tin un problema cu a capacidad pa cambia leynan ya cu esaki ta hopi limita. Tin un grupo cu a caba di caba e curso di wetgeving jurist. Esaki ta huristanan cu specificamente por cambia riba cambio di ley, a señala.
''Esey ta duna mi speransa cu e por bay mas lihe y aworaki cu esun di e di dos curso, caminda cu mas hurista ta wordo specialisa riba e area eynan, cu e cantidad di huristanan adicional aki mi ta kere nos por bay atende e cambionan", e mandatario a declara.
Aworaki, e proceso aki ta hopi slow y no por spera cu e ta bay di 0 pa 100. E ta bay ta gradualmente y ta bay aumenta pasobra tin hopi ley cu ta pega, Wever-Croes a remarca.
Di otro banda, a bisa, berdad ta bin dilanti cu mester cambia ley, pero tin algun otro punto cu e stakeholders a trece pa dilanti cu por cambia sin cambia e ley. No mester warda te ora e ley cambia pa por cambia nan.
Tin algun punto di urgencia cu lo por wordo atende asina. Un bes cu tin un gobierno forma, un di e cambionan di ley cu mester bin den e tema di Stichting BOB, por ehempel, ta cu nan yega na un registro di tur e casonan di cancer na Aruba.
Pa yega na esey mester di un ley cu ta regula privacidad di e pashentnan. Den un caso asina, ora un cliente yega na Stichting BOB nan ta puntra adelanta si e cliente ta bay di acuerdo pa nan por intercambia informacion y nan ta splica pakico.
Tin manera pa yega na e meta sin cu mester di cambia ley, Prome Minister a indica.
