ORANJESTAD (AAN): E siman aki mas studiante di Aruba a viaha pa Hulanda pa sigui nan estudionan mas avanza, cu e meta grandi di logra un profesion cu den futuro lo yude ta mas independiente,
traha pa logra un miho proyecto di bida pa su mes, pa su pais, su famia y na e momento oportuno lanta su mes famia.
Otro hobennan lo viaha pa Merca of pa un pais den Caribe pero cu e mesun meta di realiza nan soñonan di bira profesional den un rama cu nan gusta. Ora di realiza tur e tramitenan pa biba y studia afo, tur cos ta euforia, emocion, adrenalina ta subi, curazon ta bati duro, y claro, ta surgi un mezcla di sentimento y sensacionnan pasobra e hoben ta laga atras su Isla, su mayornan, rumannan y amistadnan di henter un tempo maraviyoso cu a cuminza desde mucha, sigui den su adolescencia te ora cu a caba scol.
Hopi nice cu e hoben ta bay afo cu un diploma den man caba sea di Colegio Arubano, Colegio EPI, of MAVO. Pero ta cuanto biaha e hoben a sinta pensa cuanto reto lo tin di supera den otro pais? Por ehemplo, adapta su mes na personanan cu tin otro cultura, na un clima ambiental cu cual e no ta custumbra, acomoda su mes na e idioma cu ta bay domina su dia y su bida durante su estadia den e pais di estudio, ya sea Hulandes mes, of Ingles of Spaño.
Alomenos na cuminzamento, si den e pais cu a scoge pa studia no tin hende conoci of famia, e adaptacion por ta dificil, pasobra e ta confronta cu un soledad cu kizas na Aruba nunca el a sinti. Generalmente, nos hobennan ta hopi alegre, semper tin cu ken bay un fiesta, comparti un deporte, musica, arte of cualkier otro habilidad.
Kizas na Aruba e tabata hopi tempo hinca den e rednan social, podise su mayornan diferente biaha a hala su atencion pa esaki, pero aya den tera frio of no tan frio segun unda e hoben ta bay, solamente por mira su mayornan y famia via video call, manda y ricibi mensahe via whatsapp, of scucha nan na telefon, pero nan no ta presente y sigur e hoben lo sinti nan falta maske cuanto biaha nan a sinti cu nan lo a cansa su cabes un tiki. Claro, un bez cu e hoben drenta su scol of universidad, conoce hende nobo, cosecha amistadnan, e bashi cu el a sinti e prome dianan of simannan afo, lo cuminza yena y su perspectiva ta cambia.
No obstante ta hopi importante pa e mayornan keda den contacto cu nan yiunan pa acorta, sentimentalmente, e distancia. Sigur nan a bay cu un baul extra yena cu conseho, cu balor y principio cu nan a ricibi di nan mayornan y nan educadornan durante henter un trayectoria di scol y aprendizahe en general. E siman aki sigur ta un dificil tambe pa hopi mayor cu a desprende di su prenda mas stima cu ta su yiu cu a habri su hala pa prome biaha, pa conkista un destino ainda desconoci, pero den cual e tin hopi speranza.
Seccion Hubentud den Movecion ta reitera su miho deseonan pa tur e studiantenan cu a bay Hulanda of cu ta bayendo otro pais, pa nan cuida nan salud, preveni contagio debi cu covid tey ainda na tur caminda, y cu hamas los nan man di e man di Dios. Hopi bendicion pa nan y nan estudio. Cu nan supera tur reto cu ta presenta nan dilanti cu hopi forza, perseverancia y resiliencia.
Di Hubentud den Movecion
