Venezolano cu a purba di yega Aruba via boto awor ta perdi riba lama

ORANJESTAD (AAN): E siman aki, e medio ‘Crónicas del Caribe’ a relata e storia di famianan preocupa cu nan ser keri ta perdi desde cu el a purba di yega Aruba via di un boto for di Venezuela.

   Angel Antonio Primera di 50 aña di edad, ta perdi desde Diasabra 20 di November despues cu hunto cu 9 persona nan a sali cu un boto for di Las Cumaraguas (peninsula di Paraguana) rumbo pa Aruba.  Su intencion ta pa drenta e isla ilegalmente.  Sinembargo e boto aki ta parce cu el a sink riba caminda pa Aruba.

   Net e dia aki, DIARIO a publica cu biento lo bay ta hopi debil suplando solamente entre 7 y 30 km/h.  Condicion di lama tambe ta cu olanan tabata trankil di solamente 3 y 5 pia.  For di Las Cumaraguas, nan tin di djis move straight panort y yega Baby Beach di Aruba cu ta apenas 32 km leu.

   Famianan a admiti cu ya caba na September 2021 el a wordo deporta di Aruba.  Riba e isla aki e tabata traha como metsla y tambe mecanico, y tabata biba cu su casa Aracelys de Primera, cu tres yiu y nietonan.

   Aunke su pareha a keda conseh’e pa e no regresa Aruba riba un boto debi cu e ta algo riesgoso, toch Angel a dicidi na bay haci e viahe den boto toch.  Prome cu nan a sali Diasabra cu e boto, nan viahe a wordo posponi na tres otro ocasion.  Piscadornan tabata conseha nan cu no ta bon pa subi lama cu luna yen, pasobra e tabata ilumina henter lama y nan ta core riesgo di wordo gara pa Guardacosta di Caribe Hulandes.  Y cada biaha Angel tabata pura pa bin bek Aruba, pasobra e tin dos luna caba sin mira su famia, sin mira su yiu-, y nietonan.

   Aracelys a indica cu for di ora cu el a despedi e Diasabra ey, e no a tende nada mas di dje, te cu 11’or di anochi ora cu nan a bise cu e boto a sink.  Esey ta loke Aracelys de Primera di 44 aña a bisa den entrevista na telefon cu Crónicas del Caribe.

   Segun e version di famianan na Venezuela, ora cu e boto a sink, Angel a entrega su salbabida na un di e pasaheronan cu no sa landa.  E boto a cuminza yena cu awa ora cu ainda e tabata den awanan teritorial di Venezuela, y aki Angel a logra di wanta su mes na algun bari di plastico pa asina landa bek pa tera, pero a yega den un area cu coriente fuerte cu a separa nan tur, y despues nan a perde Angel for di bista.

   Pero su pareha Aracelys ta convenci cu Angel ta bibo ainda, y cu e ta mas bien secuestra y ningun autoridad Venezolano ta yudando.  Su rumannan ta sigui busca den area di sero y costa.  Aracelys ta hasta pensa cu nan tine secuestra na pueblo di Las Cumaraguas.

   Dialuna dia 22 di November, famia- y amigonan di Angel Primera a bay na Consulado Venezolano na Aruba pa pidi yudanza.  Nan a wordo informa di un vuelo nobo di repatriacion cu lo yega Punto Fijo dia 23 di November, pero nan no a logra haya ningun cupo.

   E frontera cera cu Venezuela ta dificulta Aracelys di regresa estado Falcon pa por yuda den e buskeda na e costanan di Paraguana cu e speranza di haya e tata di su yiunan.

   Mientras tanto na peninsula di Paraguana, e rumannan a haya algun piscador cu ta yudando nan busca.  Nan a acudi na autoridadnan tambe cu a tuma nan declaracion.  A bay tambe na Guardacosta di Punto Fijo y pidi pa yuda cu buskeda.  Pero nan a bisa cu no a haya nada.

   Nan a tende si di un funcionario cu a bisa cu binti minuut despues cu e boto a sali cu e 10 hendenan abordo, nan a dal den un ola cu a pone tur hende bay awa, y nan a landa bek pa tera, pero solamente un persona a keda sin yega.