Pasaheronan fada di discriminacion di e aerolinea...
SANTO DOMINGO: E cantidad di reclamo cu gruponan cu ta proteha consumidornan a bin ta avisa ultimo temponan, y awor hasta e President di Camara di Diputado a cuminza mete su mes, y ta exigi pa Gobierno na Santo Domingo revoca tur licencia cu e aerolinea low-cost di jetBlue tin pa viaha pa e pais.
Alfredo Pacheco kende ta e President di Camara di Diputado a critiza jetBlue pa nan comportacion y “abusonan” contra e Dominicanonan cu ta viaha cu e aerolinea.
Segun Pacheco, e mes a pasa aden durante un vuelo comercial den jetBlue bulando Diasabra pasa rumbo pa Puerto Rico. Y el a ripara cu e actitud di e trahadornan di jetBlue ta solamente contra Dominicanonan.
Pesey awor, e tambe ta pidi na Gobierno di Santo Domingo pa nan revoca e licencia di jetBlue inmediatamente.
“Nan ta un set di abusador, di e forma cu nan ta trata Dominicanonan, y e ta algo tetrico,” ta loke Pacheco a bisa. El a bisa cu e mester a acudi na un actividad na Puerto Rico. E vuelo mester a subi 2:00 pm, y te banda di 5:30 pm e avion a lanta.
Prome cu e salimento laat, e aerolinea a cambia e number di Gate un total di 5 biaha. E avion mes tabata den mal condicion, e trato tabata horible, y empleadonan no ta papia spaño.
“Nan a transporta nos manera burico y baca, y cu un actitud fresco y horible contra e pasaheronan.”
Esey no tabata djis ora di bay Puerto Rico. Ora di regresa, el a pasa den problema atrobe. Ora cu el a yega Aeropuerto, na comienzo nan a bise cu e registro no ta aparece online. Ora cu e kier a hacie manual, nan a bise y e grupo di Dominicanonan cu e vuelo a wordo cancela.
Envez di busca un solucion, e aerolinea a duna cada pasahero un fecha diferente pa yega Republica Dominicano. Pa President Alfredo Pacheco nan a haci un ‘excepcion’, y a pone riba un vuelo pa Diamars mainta 6:50 am.
Pacheco a cuminza check cu instancianan na Puerto Rico, cu mesora a traha riba e asunto y a logra haya un vuelo pa varios pasahero, ya cu na e Aeropuerto tambe tabatin un otro funcionario halto wardando, tambe un artista, y varios militar sperando vuelo. Danki na e instancia aki, nan a logra yega 2:00 am.
Awor si Pacheco a bin realiza, cu tur e centenares di reclamonan ultimo lunanan di Dominicanonan ta basa riba realidad.
E Ombudsman di Republica Dominicana, esta Pablo Ulloa a bin ta pleitando e asunto aki pa basta tempo. Y awor cu el a nota cu Alfredo Pacheco ta pidi pa revoca e licencia, e ta kere cu Departamento di Aviacion Civil IDAC tambe tin di bay check y revisa tur protocol.
E ta mustra cu jetBlue su servicio a cay masha mahos mes. Calidad a bay atras, y esaki kizas tin di haber debi cu nan ta agrega mas y mas vuelo y no ta preocupa mas cu e comfort di pasaheronan. Pesey e Ombudsman tambe ta convenci cu Gobierno tin di evalua e licencia aki duna na jetBlue.
Den pasado caba ora cu a ricibi reclamo, nan a pone Instituto IDAC na altura pa busca forma di interveni y coregi e situacion.
Algo cu a socede mas recien ta ora cu e periodista y miembro di Comite Olympico Internacional, Luisín Mejia a bay bula cu jetBlue. El a pasa un momento hopi amargo riba Dialuna anochi, ora cu e vuelo di dje a wordo retraza cu mas di cinco ora sin duna hustificacion.
Pesey mes Alfredo Pacheco a indica cu e actitud discriminatorio aki di jetBlue tabata solamente contra Dominicanonan. Pasobra otro stranheronan abordo si tabata haya un trato full diferente.
Loke a pone mas hende bira furioso, ta cu durante aterizahe recien na Aeropuerto Internacional Las Americas, tur hende den cabina por a tende e stewardess bisa den microfon: ‘Bienvenidos a Santo Domingo... lárguense”.
Instituto Nacional de Proteccion de los Derechos del Consumidor, conoci como ‘Pro Consumidor’ a laga sa via un boletin riba Diamars, cu nan a fada di adverti publico pa cu jetBlue, y nan lo no hacie mas. Pasobra ta casi tur reclamo ta e forma cu jetBlue ta keda sin cumpli cu nan obligacion.
