Arthur Kelly ta anuncia:
ORANJESTAD (AAN) – Den un conferencia di prensa cu a tuma lugar na Balashi Garden, Arthur Kelly, presidente di Fundacion Mi Cutisa, hunto cu Adonsito Croes, Secretario di e Fundacion y e segundo Tesorero señor Fingal, a duna informacion tocante algun cambio cu lo tuma lugar pa loke ta e fiesta cu Doble R, na augustus proximo.
Manera ta conoci Fundacion Mi Cutisa ta traha na bienestar di e cultura di Aruba, tanto den documentacion como promocion.
E fundacion ta organizando un fundraising event cu ta consisti di un fiesta bailable. Manera a wordo anuncia algun siman pasa nan tabata tin den plan pa celebra e evento aki na Aruba Entertainment Center, pero awo a bin un cambio pa cu e localidad di e evento aki.
E motibo ta pa duna esnan cu gusta balia mas ora pa nan goza di e evento aki. Gradiciendo Aruba Entertainment Center masha danki pa nan confianza den Mi Cutisa y pa e oportunidad, pero no a logra pa loke ta trata e horario, unda cu e fiesta lo mester a finaliza pa 12 or di anochi.
Asina nan a yega na otro opcion unda por brinda hopi mas ora di celebracion y balia mas cu e ritmo di e tres bandanan clasico cu lo ta presentando, cu ta Papito y su Doble Sabor, Robert Jeand’or y e Clasico di Doble R.
E localidad nobo ta Balashi Beer Garden, cu nan ta dune e nomber di Balashi Entertainment Arena, unda lo uza e plaza completo incluyendo e parkinglot parti dilanti, y e horario ta bay te 2 or di madruga. Arthur Kelly ta garantiza cu e calidad di servicio lo keda mes halto, manera tabata den preparacion caba. Ainda tin ticket na benta y algun mesa VIP.
