ORANJESTAD (AAN): Diferente reaccion por a tende riba Diamars encuanto e punto di bista di Comerciantenan Uni cu tin biaha e medidanan pa mitiga brote di Coronavirus na Aruba, no ta bon poni den balansa.
“Loke Frans Ponson a bisa cu esnan cu ta cumpliendo cu tur protocol ta esnan cu ta sufriendo mas, compara cu esnan cu no ta atene nan mes na ningun regla. Sinceramente e tin tur su razon,” un lector a comenta na DIARIO.
Nan ta compronde con e miembronan di Comerciantenan Uni cu si ta cumpliendo cu e medidanan al pie de la letra, ta wordo poni den desventaha economico.
Un lector a indica cu Diadomingo e tabata na un establecimento di cuminda y diripiente 3 persona a drenta, y a bisa cu nan kier sinta come pero nan kier pa toca musica duro pa nan enjoyment.
E restaurant tabatin tur speakers paga, y e doño a bisa nan cu e lo no bay cende musica.
E 3 persona aki a djis lanta para, y sali bek sin pidi nada. E ta nan pleno derecho. Pero sigur nan lo a bay na un otro negoshi cu si ta permiti nan haci kico cu ta.
Pero tin personanan cu a reacciona pa bisa cu e medidanan ta ainda demasiado drastico.
Manera ta conoci, riba Dialuna, Frans Ponson di Comerciantenan Uni a splica cu e balanza di igualdad pa cu trato di tur hende den comercio, no ta bon nivela! Net esnan cu si ta cumpliendo cu tur protocol y reglanan sanitario, ta mira cu nan negoshi ta bashi. Y tur e otronan cu no ta preocupa cu ningun regla, nan tabatin establecimentonan pata-pata den fin di siman cu a pasa.
Frans Ponson di Comerciantenan Uni a splica cu den fin di siman ta tur hende por a mira e pachanga cu tabatin na varios establecimento, esta baliamento estilo jump-up y ningun hende ta preocupa cu regla di distanciamento social.
