Un scandal pa Tribunal di Cuenta como protector di Ley di Contabilidad - *Un momento scur den e historia di Algemene Rekenkamer Aruba - *Un bofta historico pa titulo di honor den e sistema legal di Aruba
ORANJESTAD (AAN) — Algemene Rekenkamer Aruba ta nomber di e instancia cu DIARIO a uza den curso di ultimo añanan pa asina splica Aruba kico a pasa cu placa di Pueblo na momento cu abuso di placa di Pueblo a marca gobernacion.
Algemene Rekenkamer Aruba ta e colegio halto, cu mester defende e bienestar y interes di Pueblo di Aruba pa medio di control riba e forma cu placa di Pueblo ta wordo gasta.
E lugar di Algemene Rekenkamer Aruba den e sistema legal di Aruba ta asina halto, cu Corte di Husticia ta uza Algemene Rekenkamer Aruba den casonan administrativo.
Un nombramento na Algemene Rekenkamer Aruba, ta un asunto di honor y di confiansa grandi cu Pueblo ta duna personanan cu ta keda encarga cu e defensa directo di placa di Aruba cu mester wordo gasta y bira entrada, segun leynan estricto.
Ta cu e Ley di Contabilidad den man, DIARIO a lanta para contra Bo Aruba, e proyectonan cu contra tur base di bon gobernacion y contra Ley di Contabilidad, a wordo introduci y a haci cu generacionnan cu ta bini, lo mester paga pa un abuso politico.
Ley di Contabilidad ta e alma di un Gobierno democratico pasobra e ta regla con politiconan por atende cu placa di Pueblo.
Pa comprende loke a pasa na momento cu Polis a detene e Vice Presidente di Algemene Rekenkamer Aruba, Frederik Nuboer, pa buracheria publico segun informacion, mester comprende kico ta Algemene Rekenkamer Aruba.
Tur, pero tur decision cu wordo tuma y cu tin resultado financiero pa Aruba, ta wordo controla dor di Algemene Rekenkamer Aruba, cu asina directamente ta bira e herment di Parlamento di Aruba pa cumpli cu nan debernan relaciona cu e deber di Parlamento pa dicidi kico ta pasa cu placa di Aruba.
Algemene Rekenkamer Aruba ta controla autenticidad di tur asunto financiero di gobernacion di Aruba y caminda ta necesario ta haci investigacionnan profundo manera a pasa den e caso di e proyectonan di Bo Aruba, cu ta uno di e abusonan mas grandi di placa di Aruba.
Algemene Rekenkamer Aruba ta un autoridad den nos sistema y cada persona cu mester traha na Algemene Rekenkamer Aruba of ta hasta miembro di e organo halto, mester duna contenido na e balornan mas halto di Aruba.
Algemene Rekenkamer Aruba ta un colegio di ciudadanonan, cu ta haya personal cualifica na su disposicion pa duna contenido na nos base legal.
Frederik Nuboer a wordo nombra tempo di Gobierno Mike Eman y te cu ayera tabata Vice Presidente di e organo, ora el a dicidi di tuma su retiro despues di a haya su mes den problema cu Polis.
Ayera historia a wordo skirbi pa Algemene Rekenkamer Aruba, un nomber di prestigio nacional, cu a wordo cubri cu berguensa pasobra Polis a atende cu e persona cu tabata fungi como su Vice Presidente.
E necesidad di integridad a bini dilanti atrobe pasobra den e funcionamento di un pais, e moral di funcionarionan den puestonan di honor, sigur ta afecta imagen di e pais pero tambe e confiansa cu e pais mester tin cu su bienestar ta wordo honra y cu ningun hende por mustra dede riba su representantenan oficial.
Polis a detene Frederik Nuboer, cu tabata den un funcion cu ta decisivo hasta den casonan cu Corte di Husticia mester di interpretacion corecto y investigacionnan mester wordo haci.
Cumplimento cu Ley ta esencial den Algemene Rekenkamer Aruba, e Tribunal di Cuenta, e autoridad pa dicidi si Gobierno a tene su mes na Ley di Contabilidad den e forma cu el a atende cu placa di Pueblo.
Aruba a conoce un momento historico, pero bergonsoso cu ta duna mas motibo pa amplia nos leynan cu ta atende cu integridad den tur sector cu ta actua na nomber di e Pueblo di Aruba, cu a haya otro bofta den su cara cu e suceso lamentabel.
