Varios inversionista tin plan grandi pa lanta cabez di Oranjestad bek

Frans Ponson di Comerciantenan Uni Aruba

• Algun diseño di edificionan nobo cu lo por bin na Playa 

ORANJESTAD (AAN): Frans Ponson cu ta na cabez di e organizacion di Comerciantenan Uni Aruba, tambe ta mustra su amor pa ciudad principal di Aruba, y cu tin di haci tur lo posibel pa evita cu e lugar aki ta bay atras.

   Por a mira e ultimo 20 añanan aki e cambionan, pero ta keda ningun secreto pa hendenan cu ta mira con Playa a keda bay atras!  A inventa varios forma pa haci esaki mas atractivo, y na final di dia por a keda mira con negoshinan ta bandonando e sector, y lugarnan ta cerando.

   Historia a mustra cu ora Gobierno a duna negoshinan na Palm Beach pa habri... esaki a bira un exito.  E asina yama Hot-Zone aki (Hotel Zone) a crece exponencialmente, sinembargo Oranjestad a keda cay.

   “Oranjestad ta nos capital, ta centro di e pais!  Ora un turista yega y ta pasa den centro di pais, e ta duna un imagen di e pais,” Frans Ponson a declara na prensa.  Pero cu loke ta visible awor, e ta sigur cu ningun ciudadano ni Gobierno lo no desea pa turistanan mira e imagen actual di Oranjestad.  “Pesey nos tin di haci algo,” Ponson a indica.

   Cu un presentacion, nan kier mustra con importante Caya Grandi ta.  Comerciantenan ta sinti cu tin di haci algo, pero un solo persona no por haci esaki.  Nan kier mustra ta cuanto proyecto e miembronan di Comerciantenan Uni Aruba (CUA) tin den pipeline pa Caya Grandi. No ta papiando di otro inversionistanan local of internacional cu tambe tin interes.

   Ponson a trece un slide-show pa prensa y pa gobernantenan mira.  El a splica asina, cu ora cu mayoria negoshi a bay Palm Beach y a bandona Playa... tin comerciantenan cu si a keda kere den Oranjestad, cu si a inverti y cu ainda ta existi.  Pero nan ta un grupo chikito, y tin di bay haci cambio grandi pa asina drecha ciudad.

   Comerciantenan a aprecia cu Gobierno a bin cu varios cambio nobo pa Playa, e.o. Wilhelminastraat, y esaki ta haci e inversionistanan local bira contento cu esey.  A mira cu Ministro a publica cu lo bay tin un Studentenflat den ex-edificio di Ministerio Publico patras di Zara, y e ta wordo sosteni door di Comerciantenan.  Pasobra e ta yuda trece movimento den caya, studiante den caya, y ta yuda comerciantenan.

   Gobierno no por haci’e su so, y comerciantenan local tampoco no por haci’e su so, nos mester ta un team pa hunto haci esaki.

   Ponson a presenta diferente potret di proyectonan nobo cu ya ta bao construccion, y tambe algun otro cu ta planea pa bin den e.o. Caya Betico Croes, Steenweg, Emanstraat, Emmastraat, y mas.