Varios alumno den shock cu fayecimento di ex-docente di Colegio Arubano

ORANJESTAD (AAN): Un di e docentenan cu tabatin curazon di oro, cu tabata anda bon cu tur alumnonan di Colegio Arubano na Vondellaan, a fayece e siman aki. 

Mesora e informacion aki a core rond, y tanto docentenan cu a conoce, y tambe su ex-alumnonan a keda den shock.

   Ta trata aki di docente Michiel Korsten, kende tabata duna les di Geschiedenis pa tanto HAVO y VWO na Colegio Arubano.  Describi como un docente kende semper ta apoya studiantenan pa haci nan best, y tabata yuda nan cu cualkier dificultad di les, of ora di leer pa Tentamen.  E tabata semper activo den eventonan social, a hasta participa numeroso biaha como boluntario incansabel pa actividadnan di Aruba Doet, y a yuda tambe cu viahenan di HAVO-4 pa exterior.

   Meneer Korsten tabata un inspiracion grandi pa alumnonan, y demas docentenan.  E tabatin un entusiasmo grandi y amor pa Geschiedenis, y esaki tabata pone alumnonan pone mas atencion durante su lesnan.

   Tabata Aña Escolar anterior cu Meneer Korsten a bira malo, y el a wordo manda pa Docternan haci saminacion na Colombia.  Eynan a conclui cu e tabatin un cancer cu ya ta den etapa terminal.

   Esaki a pone Meneer Korsten tuma decision cu e ta stop di duna les, y a regresa Hulanda pa asina pasa su “ultimo siman- y lunanan” cu su famia mas cercano.

   Momento cu a haya sa cu Meneer Korsten a fayece, den oranan di mainta na un forma silencioso, alumnonan a para dilanti edificio di Colegio Arubano pa asina observa cu tabata hisa bandera di Hulanda, y tambe bandera di Aruba na half-stok.

   Riba Social Media ta monton di ex-alumno a expresa tur e bondad cu Meneer Korsten a haci, e empuhe cu el a keda duna nan pa asina sigui haci les, duna mihor prestacion den Tentamen y Examen.   Empuhe enorme cu e sosten necesario, pa cual eternamente nan ta keda agradecido na Meneer Korsten, un berdadero hende cu bon curazon cu a haci hopi pa enseñansa di scol avanza.

   Na famia-, coleganan, y ex-alumnonan di Meneer Korsten, DIARIO ta extende su mas profundo palabra di condolencia.