ORANJESTAD (AAN): Un variante nobo di Covid-19 cu a afecta residentenan vacuna y personal di un cas di cuido na Kentucky a wordo detecta den 47 Estado di Merca.
E variante R.1 a propaga entre 45 residente y empleadonan di e cas di cuido pa un empleado no vacuna, Departamento di Salud Publico di Kentucky a informa.
Debi na su mutacion, e variante, detecta pa prome biaha na Japon, tabata capaz di scapa di e proteccion di anticurpa presente den personanan totalmente vacuna.
Segun Outbreak.info, un website cu ta recopila informacion riba variantenan di Covid-19, te cu 21 di september, R.1 a infecta mas di 10,567 persona alrededor di mundo y a wordo detecta den 47 Estado na Merca.
Maryland tin e cantidad mas grandi di caso, cu 399 detecta desde cu el a wordo haya pa prome biaha den e pais.
Den total 2,259 persona a wordo identifica cu variante R.1, cu a wordo detecta pa prome biaha den e pais dia 15 di maart di 2020. E caso mas recien tabata 6 di augustus y a wordo haya den 0.5 porciento di e casonan.
Outbreak.info tambe a indica cu e variante a wordo localiza den por lo menos 31 pais alrededor di mundo, incluyendo China, India y varios nacion di Europa occidental.
Apesar di cantidad abao di infeccion, William A. Haseltine, profesor di Scol di Medicina di Harvard, a bisa cu mutacion nobo haya den variante R.1 por yud’e propaga hopi mas facil.
Den un articulo, Haseltine a bisa cu e cinco variacion haya den R.1 por tin un “resistencia mas halto contra anticurpa”. Loke ta nifica cu esaki por ta un variante cu por evadi anticurpa cu crea pa e vacuna y si un persona a haya Covid.
R.1 ta contene mutacion W152L den un region di proteina di e spike, cu ta e obhetivo di anticurpanan y cu por reduci su efectividad, segun Centronan pa Control y Prevencion di Malesanan (CDC).
E mutacion W152L tambe ta presente den un variante menor di Delta cu a wordo detecta na India.
R.1 tambe ta comparti un mutacion cu otro variantenan, specialmente C241U, NSP12: P323L y D614G. D614G a causa un aumento den infeccion, aunke no ta conoci e efectonan di e otro dos. E tres mutacion a wordo detecta den variantenan cu ta substitui e variante original di Wuhan.
Informacion di Universidad Johns Hopkins a registra cu mas di 4.55 miyon di persona a fayece durante pandemia di covid-19 y a infecta alrededor di 229 miyon.
Organizacion Mundial di Salud (WHO) a sigui monitor variantenan di Covid-19 y ta clasifica nan segun porcentahe di infeccion.
Eta, Iota y Kappa a wordo degrada recientemente, di “variante preocupante” pa “variante bao di monitor”, despues cu su circulacion a wordo afecta pa otro variantenan.
