Na 2020 ya Wever-Croes a mustra cu e no ta keda lomba contra muraya - *Aruba riba plataforma internacional por entrega logro na mundo - *Hulanda ta na haltura cu Aruba no ta entrega su spada na forma facil
ORANJESTAD (AAN) — E Asamblea General di Nacionnan Uni na 2021 ta tuma lugar na un momento historico.
Gobernantenan di tur parti di mundo ta bini hunto na un momento crucial pa planeta Tera cu ainda ta den un shock provoca pa e Coronavirus nobo pero mester sigui cana pa un futuro cu lo mester wordo revisa y ahusta continuamente.
Cu Nacionnan Uni a logra su meta di Paz Mundial, ta algo cu DIARIO ta rechasa manera algun dia pasa nos a trece dilanti a base di realidad.
Cu Nacionnan Uni sigur ta forma un plataforma internacional caminda lidernan mundial ta topa y asina paisnan ta discuti nan desaroyo y logronan, ta algo cu nos ta kere firmemente.
E hecho cu Aruba tabata presente na e momento cu mundo a bini hunto, sigur ta importante mas ainda si tene na consideracion cu durante e reunion di Nacionnan Uni, Aruba a bini dilanti den su berdad constitucional.
Aruba tabata parti di Reino Hulandes, un relacion cu Aruba por a discuti tambe cu e representante di Gobierno Hulandes, Prome Ministro Rutte cu por a reuni na un momento politico dificil pa Hulanda cu prome Ministro Evelyn Wever-Croes di Aruba.
Te awor e relacion entre Hulanda y Aruba for di momento cu Wever-Croes a asumi poder, tabata uno bon debi na e forma cu Aruba y Hulanda por a atende cu otro.
No ta prome bez Evelyn Wever-Croes como Prome Ministro di Aruba mester enfrenta Reino Hulandes cu ta trata di pone Aruba lomba contra muraya.
Na momento cu na 2020 Aruba a pidi yudansa di Reino, por a mira con a trata di pone Aruba lomba contra muraya pero na e momento Prome Ministro Wever-Croes a duna prueba cu Aruba por sigui dilanti na mesa di negociacion dor di un prestamo local.
Awe Aruba a bolbe reuni cu Hulanda cu ta bon na haltura cu na e momentonan aki e no por exigi Aruba, baha su gastonan di Cuido Medico cu ta algo cu Hulanda mes no por haci.
E hecho cu Aruba atrobe ta pospone fechanan pa yega na un acuerdo ta hiba nos atrobe hasta na momentonan prome cu e pandemia, ora Aruba tabata negocia cu Hulanda pa yega na solucionnan pa e crisis financiero cu Gabinete Wever-Croes mester a soluciona na 2018.
E reunion di Nacionnan Uni tabata un bon momento pa Wever-Croes a presenta na mundo e cara di logro di Aruba cu como pais chikito a haya elogio di organisacionnan internacional pa e forma cu el a atende cu e pandemia.
Mundo a conoce un Aruba cu no ta entrega spada na e momentonan mas dificil pero ta sigui traha riba solucionnan.
Reino Hulandes ta conoci cu e realidad aki.
E encuentronan na ocasion di e reunion di Nacionnan Uni, sigur ta ocasion importante pa Aruba, cu sostene pa e opinionnan di organisacionnan internacional por a duna prueba cu Aruba a sigui cana pa awe hunto cu gobiernonan di paisnan grandi, enfrenta un futuro nobo di e reto mas grandi, cu ta e realidad di loke Pandemia Covid-19 a laga atras den un mundo cu mester wordo reconstrui.
