Segun Rulienne Arends di FADA:
*No tin supervision, no tin control, no tin ley, no tin sancion
ORANJESTAD (AAN): Segun Rulienne Arends di Fundacion Anti Droga Aruba (FADA), uzo di vape entre muchanan y hobennan a bira un problema cada biaha mas grandi den comunidad. Un di e motibonan principal, segun Arends, ta cu desde principio e problema no a wordo tuma suficientemente na serio.
Arends a splica cu, na momento cu FADA a cuminsa alerta comunidad tocante vape, e topico ainda no tawata masha conoci na Aruba y solamente den poco ocasion tabata constata casonan na scol. Sinembargo, durante e añanan e situacion a cambia considerablemente y vaping a bira facilmente accesibel, incluso pa menornan.
Segun Arends, producto di vape tabata — y ainda ta — wordo bendi den supermercadonan sin suficiente control. No ta pidi identificacion na momento di compra y tampoco tin sancionnan pa supermercadonan cu ta bende e productonan aki na menornan. El a enfatisa cu legislacion actual ainda tin varios buraco cu ta limita posibilidad pa autoridadnan actua efectivamente.
“Ciudadanonan ta mira muchanan cumpra vape den supermercado y ta yama polis. Sinembargo, polis no por haci mucho mas cu duna un advertencia, pasobra no tin un ley cu ta permiti nan actua diferente,” Arends a splica.
Tambe el a mustra cu propaganda y presentacion comercial di productonan di vape ta masha atractivo, specialmente pa hobennan. E productonan ta wordo promociona ampliamente y por wordo haya na diferente lugar rond Aruba.
“Tur esaki ta haci vape facilmente accesibel. Un menor por drenta un supermercado y cumpra un vape. E falta di control a contribui cu, awe, vaping entre nos muchanan ta bira un problema preocupante,” Arends a indica.
Segun e representante di FADA, e situacion ta pira pio door di presion di grupo, conocí como peer pressure, y door di e hecho cu varios mucha ta uza vape scondi. Ademas, tin hopi caso den cual adultonan y mayornan mes ta permiti nan yiunan menor di edad uza e productonan aki.
Arends tambe a expresa preocupacion tocante familiaridad di marijuana entre muchanan di scol basico. Varios mucha ya a tende papia di e droga, sa kico e ta of tin familiar cu ta uza marijuana. Den diferente caso, muchanan a admiti cu marijuana ta presente y facilmente accesibel den nan propio cas.
FADA ta considera cu e situacion ta exigi atencion urgente y coordina entre Gobierno, scolnan, mayornan, comerciantenan y organisacionnan preventivo. Mester tin ley y control efectivo riba bendemento, informacion continuo y mas supervision na cas ta esencial pa evita cu mas mucha ta cay den uzo di vape y otro sustancianan na edad tempran.
