Shahyra Loefstok di FCCA:
ORANJESTAD (AAN): Señora Shahyra Loefstok di FCCA a duna informacion tocante e accion cu lo tuma luga dia 25 di juli proximo, Dia Nacional pa Cuida Aruba, cu ta un iniciativa di Gobierno di Aruba. FCCA ta uni na e bunita iniciativa aki y ta pidi comunidad, specialmente su clientenan, pa uni tambe na e iniciativa aki.
Señora Loefstok a remarca cu FCCA ta encurasha ciudadanonan pa, enbes di benta articulonan y mueblenan cu ainda ta den bon condicion, pone nan disponibel pa personanan of famianan cu tin mester di nan.
Señora Loefstok ta haci un yamada na comunidad pa, prome cu tira un mueble of cualkier otro articulo afo, verifica si ainda e ta den bon estado y considera di regal’é na un persona cu por haci bon uzo di dje.
Segun Loefstok, un mueble di segundo mano por ta completamente den bon condicion y uzabel y di gran balor pa un otro persona. E mesun cos ta conta pa diferente tipo di articulo. Segun e, loke pa un persona por ta sushedad, pa otro persona e por ta algo cu e por uza.
Durante e accion lo tin diferente localidad rond Aruba unda ciudadanonan por entrega e articulonan. Informacion tocante e puntonan di entrega lo wordo publica riba e paginanan di media social di FCCA. Ademas, FCCA lo comparti e informacion via su broadcast list di WhatsApp y Facebook.
“Esaki ta un bon iniciativa y nos ta encurasha tur ciudadano pa participa na e accion aki”, señora Loefstok a expresa.
