Freddy Gonzalez Subiria:
ORANJESTAD (AAN) – Den entrevista cu DIARIO, señor Freddy Gonzalez Subiria, ken a duna un charla na Fundacion Rancho tocante e historia di Vallenato, a comenta cu e ta escritor, Comunicado Social y aworaki e ta investigador independiente.
Gonzalez tin 12 aña dedica na investiga e musica Vallenato, specialmente enfoca riba e compositornan, y den e personanan cu a inspira canticanan: e musanan.
E ta considera cu e bida di e escritornan di musica ta hopi desconoci, y e charla cu el a duna na Fundacion Rancho, tabata dirigi precisamente na esey: con un cantica Vallenato ta nace. Y el a duna varios ehemplo. El a expresa cu tur tin di haber cu e costa Caribe, y mayoria di e cancionnan aki a nace na La Guajira den un epoca cu su comercio tabata tin un lazo estrecho cu Aruba.
Y tur e canticanan ey tabata biaha di Guajira pa Aruba y asina a cuminza trece gruponan musical cu a presenta akinan. El a splica cu Vallenato ta un mezcla: e no ta Indigena, Africano, ni di raza blanco. El a reitera cu Vallenato ta un mezcla y tambe su compositornan y musiconan, y nan ta yame “crioyo” pasobra e tin un tiki di tur.
