ORANJESTAD (AAN): Minister Dangui Oduber a laga sa cu turismo 'stay-over' ta pasando un bon momento y ya caba e proyeccionnan a surpasa e escenario di mas optimista cu ATA mes a proyecta.
Den luna di Juli ta bay ricibi 92 mil turista den comparacion cu Juli 2019.
Esaki ta algo excepcional den tempo di pandemia. Ta mira con e situacion ta na Hulanda, na Japon y te hasta na Merca unda e casonan ta subiendo.
Na Aruba tin un bentaha y esaki ta cu mayoria di hende den comunidad a vacuna y pesey ta keda pone hopi enfasis den e hecho cu tin cu keda stimula y aconseha esnan cu ainda no a tuma nan vacuna pa hacie.
Ta mira cu e variante Delta ta lantando cabes na mayoria di pais na mundo y na Aruba tin e situacion bao control. No tin asina hopi caso y ta spera cu e situacion keda di e manera aki. Toch ta importante pa aconseha esnan cu ainda no a vacuna pa un of otro motibo pa bay tuma e vacuna.
Na Aruba tin e vacuna di Pfizer y tambe esun di Johnson & Johnson cu ta un 'single shot'. Tin vacuna disponibel y a cuminsa vacuna tambe hobennan entre 12 te cu 17 aña. Den weekend tabata tin e vacunathon hubenil cual a resulta uno hopi exitoso, Oduber a remarca.
Ta keda recomenda comunidad henter pa vacuna pasobra esaki tabata e solucion cu e pone cu awe Aruba ta recuperando di e forma cu den luna di Juli ta bay ricibi 92 mil turista 'stay-over' mientras cu ya caba ta ricibiendo e di dos linea crusero cu ta Carnival Horizon, Minister Oduber a declara.
