Expertonan mundial y Organisacion Mundial di Salud ta topa riba un punto - Covid-19 ta bira un circulo vicioso pa hende cu no kier tene pacenshi - Mundo ta dera su cabez den santo y ta habri caminda pa malesa crea desaster
ORANJESTAD(AAN)- Ta cu hopi sacrificio mundo a supera un ola tras di otro di Covid-19. For di prome momento tabata conoci cu e lucha lo no tabata facil y cu, mescos cu a pasa cu tanto malesa cu a presenta na mundo pa keda, mundo lo mester a cumpli cu exigencianan di Covid-19 tambe.
Na Juli 2020, ainda hopi hende tabata hari ora bisa cu un vacuna por a wordo introduci pa Covid-19 y cu ya pa cuminsamento di 2021 un parti di mundo lo a ricibi e proteccion contra e malesa.
Cifranan ta demostra cu e vacuna ta un proteccion grandi contra e enfermedad y no ta un fabula. Cu mester of no mester di un shot mas of na forma regular, ainda mester keda estableci den e proceso cu ta depende di e informacionnan cu ta drenta cerca cientificonan, cu mester nota con hende ta reacciona riba entre otro vacuna y con efectivo e vacuna ta contra e enfermedad.
Tur hende ta na haltura cu ta trata di un proceso mescos cu tur malesa cu awe conoce proteccion, a conoce.
E forma cu e vacuna a bira un defensa importante contra e malesa, sigur a bini dilanti den e cantidad di casonan fatal cerca gruponan specifico. Por nota cu e cifra alarmante di ancianonan cu a bira victima di Covid-19 a baha.
Cu ainda hende mester cubri un distancia prome cu e por regresa un bida normal ta conoci mescos cu tur hende tabata na haltura cu e normal lo no ta “normal di antes” pero “normal nobo”.
Awe e hende, cu a lucha y a haci sacrificio, ta entrega spada. Despues di un careda pisa for di momento cu e malesa a presenta, awe hende a cansa y hasta a bira cobarde pa sigui lucha.
Na un momento decisivo hende no por spera algun luna mas pa regresa un normal nobo, cu lo nifica cu hende mester sigui tene na cierto reglanan pa motibonan masha importante.
Den informacionnan nobo cu e Organisacion Mundial di Salud a emiti, e loke DIARIO a presenta na tanto ocasion a bolbe wordo resumi.
Tur hende tabata sa cu den e normal nobo mester a mantene distancia, mester a sigui uza tapa boca, mester a mantene reglanan di higiena, mester a evita situacionnan cu hopi hende ta topa y cu ta riesgo pa hende.
E pregunta grandi cu expertonan ta haci nan mes ta, si hende kier yega e final di Covid-19 manera planifica. Variantenan ta sigui presenta manera por a spera, pasobra tur enfermedad conoce evolucion cu ta cambio.
For di prome momento a mustra cu 85 porciento di un comunidad mester ta vacuna pa e comunidad por considera su mes for di peliger directo, pero cu mantencion di cierto regla.
Mundo a bira chikito. Tin pais cu habitantenan cu ni sikiera ta conoci cu e berdad di Covid-19 y te ainda no ta na haltura di algo cu yama vacuna.
Apertura di fronteranan ta trece hende hunto pafo di otro pais.
Tin problema. Produccion mundial a sufri. Comunidadnan mester produci.
Teniendo na consideracion e cantidad di hende na mundo cu ainda no a vacuna, hende mester acepta un normal nobo. Hende no por bringa contra naturalesa, cu den pasado a presenta peste y cantidad di malesa pa cual awe hende ta vacuna.
Na 2020 hende a cuminsa un careda contra Covid-19 y comunidad di Aruba sigur ta na haltura di e prijs. Awor ta na hende pa dicidi e prijs cu e kier paga dor di entrega spada na Covid-19 y no lucha un rato mas.
