ORANJESTAD (AAN): Docter Yuri Casseres tambe tabata presente durante conferencia di Crisis Team y el a bisa cu e situacion ta serio.
Situacion ta serio na Hospital y nan tin un reto hopi grandi pa trata tur pashent cu ta den Hospital. Den momentonan aki tin 46 pashent interna y apenas siman pasa e docter a bisa cu esaki tabata 20 pashent, 2 siman pasa tabata apenas 5 pashent, kiermen si haci un evaluacion tin 9 biaha mas pashent compara cu dos siman pasa. Si e situacion sigui subi asina, Hospital ta bay yena capacidad cu solamente pashentnan di Covid. Mester corda cu Hospital ta brinda cuido na mas pashent.
Segun Dr. Casseres, tur medida cu Crisis Team ta tuma ta pa controla e cuido medico. Hospital ta haci di su parti pa brinda un cuido safe na tur pashent.
Hospital tambe a dicidi di tuma medida na unda tur pashent cu mester wordo opgenomen, si ta via Spoedeisende Hulp of pa un operacion mester wordo getest. Pa motibo di aumento di casonan di Covid na Aruba, mas cu un persona no tin sintomanan of den caso cu un persona ta sconde e sintomanan pa asina por wordo opera na Hospital, nan kier ta sigur cu e persona no ta infecta. Si un persona ta infecta, y ta den mesun camber cu otro pashentnan, e por infecta e otronan.
For di diamars a cuminsa test tur hende den Hospital. Si cualkier persona ta sinti sintomanan relaciona cu Covid, nan ta test pa siguridad. Nan ta pidi pa pashentnan ta sincero si nan tin sintomanan pa no afecta otro pashentnan of personal. Nan a bira hopi mas estricto riba esaki pasobra personal tambe por pega cu Covid y nan tin tiki personal. Si nan cay afo, nan no por yuda mas hende.
Hospital ainda ta purbando di sigui nan operacionnan, pero na dado momento nan lo mester di persona di operacion den piso di Covid.
Dr. Casseres a bisa cu den piso di maternidad tin pashentnan cu Covid. Tur di nan no ta vacuna. A pasa un caso na unda mester a termina e embarazo prome cu necesario of e baby mester a nace prome cu tempo, pa motibo cu e mama ta asina malo cu e no por haya yiu normal of na su tempo. El a enfatiza cu vacunacion di hende muher na estado ta safe y no mester tin miedo cu e vacuna ta bay tin efecto riba e baby. E ta urgi tur muher na estado actualmente pa bay vacuna, asina no mester pasa den e casonan menciona.
Entre muchanan tin casonan di Covid, pero actualmente tin un mucha interna den Hospital y su condicion di salud ta bon.
Dr. Casseres a bolbe pone enfasis cu mayoria di casonan den Hospital ta di persona cu no a vacuna y esnan cu si a vacuna, ta menos malo y no mester a bay den ICU. Aruba ta mandando pashentnan di ICU na Colombia, pasobra nan kier tin suficiente espacio den ICU pa duna e cuido necesario, sea ta pashent di Covid of otro pashentnan.
