Prome Minister Evelyn Wever-Croes: - * si den siete dia no logra estabiliza e aumento di casonan, lo mester escala e medidanan
ORANJESTAD (AAN): Durante un conferencia pa informa comunidad e ultimo desaroyonan relaciona cu situacion di Covid na Aruba, Prome Minister Evelyn Wever-Croes a bisa cu Aruba a pasa riba 1000 caso activo. Riba diahuebs DVG a registra 137 nobo di Covid y tin un total di 1053 caso activo. Hospital tin 46 persona interna, den cual 7 ta den ICU y segun datonan un 64 porciento di esnan den Hospital no ta vacuna.
Lamentablemente por a mira riba diaranzon cu 2 persona a fayece y diahuebs 2 persona mas a fayece.
Prome Minister a indica cu e medidanan cu a introduci siman pasa no a estabiliza e aumento di casonan y Gobierno a dicidi cu no por warda pa 14 dia mas pa tuma medidanan manera nan ta custumbra di haci, pa asina evalua y dicidi si mester tin mas medida. E medida di Gebiedsverbod y Orario di Ciere a yuda hopi, pero por a constata cu datonan di DVG, di Bron en Contactonderzoek cu e problema mas grandi ta den nightlife, kiermen bar y restaurantnan.
Tambe a keda constata, cu mas mucha ta wordo contagia y scol ta bay habri otro siman. Pa motibo aki, Gobierno a haya nan mes forza di tuma e siguiente decisionnan:
- Pa loke ta trata 'nightlife' of entretenimento, e medida ta cu solamente 1 musico por duna entretenimento; musica mester ta na nivel di 'background'. No mas musica y nos mas baliamento.
Medidanan cu a bin cune siman pasa no a pero esaki a yuda, pero datonan DVG a indica cu e problema mas grandi ta den bar, restaurant y bida nocturno.
2.Scol no por habri otro siman y lo pospone te cu 1 di September como medida preventivo. E grupo di muchanan, specialmente di scolnan basico y scol preparatorio no por wordo vacuna, pero si nan ta birando victima di Covid. Prome Minister a enfatiza cu apesar cu muchanan riba 12 aña si ta permiti pa vacuna, den seis siman cu mayornan tabatin pa hiba nan yiunan vacuna, solamente 30 % a haci esaki.
Actualmente e problema no ta bao di adultonan so, sino bao di hoben y muchanan. Gobierno ta considera e decisionnan aki como e caminda pa yega na un solucion. Y si den siete dia no logra estabiliza e aumento di casonan, lo mester escala e medidanan.
E mandatario a indica cu Crisis Team no ta considerando un Toque de Queda ainda, pasobra nan por a constata cu despues di implementa e ultimo medidanan, manera orario di ciere a duna bon resultado.
E enfasis actual ta muchanan bao di 12 aña, cu no a wordo vacuna.
Prome Minister a bolbe enfatiza cu e vacuna ta e unico solucion pa no tin efectonan severo. Aruba ta den di 4 ola y e situacion ta critico. No ta motibo pa panico pero e situacion ta serio y tur hende mester para keto y realiza cu esaki ta den nos man.
