Dr. Jose Sprok cu sugerencia na Gobierno: - Tur hende mester vacuna!
ORANJESTAD (AAN): Aruba a alcansa diaranson un total di 12 mil caso di Covid-19 pa loke ta e transcurso di e pandemia.
123 caso nobo y mas di 600 caso activo ta representa pa e isla un piek den loke ta e cifranan di Covid-19 pa loke ta 2021.
E arubiano Dr. Jose Sprok, cu ta un Specialista den Ciruhia Cardiovascular radica na Costa Rica, den entrevista cu DIARIO a expresa su preocupacion relaciona cu Covid-19.
El a bisa cu na fin di juni inicio di Juli e tabata na Aruba y e por a constata un 'free for all'. "Nos ta den pandemia ainda. Nan no a lanta e pandemia. E hecho cu Aruba tabata tin poco caso no kiermen cu nos ta cla", a remarca.
El a expresa cu e sigur lo mantene alomenos vigente e uzo di tapaboca pasobra esey ta e unico manera cu por preveni e expansion di Covid-19.
Segun Dr. Sprok, esaki ta e sugerencia pa gobierno di Aruba como medico y conocedor di loke ta pasando.
El a sigui bisa cu e recomendacionnan ta sigui: tapaboca ta uno, mantene distancia ta otro, laba man y mester insisti of practicamente exigi den algun manera pa tur hende vacuna sino e virus aki no ta bay caba nunca.
"Berdaderamente e estudionan clinico cu ta evaluando e vacuna tanto di Pfizer como di AstraZeneca ta demostra cu, inclusive e ta yuda cu e variante delta. Esun di Pfizer un tiki mihor cu esun di AstraZeneca", a expresa.
E medico a enfatisa cu e lo mantene e recomendacionnan basico pa tur hende. "Unda cu bo bay, bay cu bo mondkapje. Laba bo man y toch mantene distancia. Tur e cosnan basico cu a siña for di cuminsamento.
