PARAMARIBO: Narcotraficantenan ta busca tur forma pa sconde cocaina, pa asina por transporta esaki sin wordo detecta rumbo pa sea Merca of Europa.
Cada biaha cu nan sconde cocaina mey-mey di cargamento, of den bom falso di un container, nan ta wordo gara. E biaha aki nan a dicidi na yena e tubonan largo di hero cu cocaina. E heronan aki ta poni 2 na cada porta, pa asina por cera e portanan di container.
Douane Recherche di Suriname tabata mas sabi cu nan, y riba Dialuna a logra detecta e droga scondi den e 4 tubonan hol aki cu tin instala pafo di e porta di container. A cuminza cu un investigacion y ya caba 2 hende a wordo aresta.
E hombernan di 33 aña y 32 aña di edad, ta trahando pa un Compania di Import y Export na Suriname.
Ta parce cu e hombernan aki a wordo aresta un dia despues cu a haya e droga aki na Saramacca. Investigacion lo determina kico nan envolvimento ta den e transporte di droga aki.
E droga aki tabata scondi den e cuatro tubonan hol aki, di e containernan cu tabata bashi. Polis di Suriname a divulga esey.
Douane Recherche hunto cu Recherchenan Anti-Droga, cu yudanza di Cuerpo di Bombero a bay los y zaag pa kita e tubonan aki. Asina a confisca esaki.
