Reaccion di Directiva General di VWI
Ayera, 29 di augustus 2022, Gobierno di Aruba (GdA), Utilities Aruba N.V., WEB Aruba N.V. y N.V.
ELMAR, hunto a tene un conferencia di prensa informando pueblo di Aruba kico e plannan pa energia
renovable di e “vision” y “plan energetico” di GdA ta encera.
Nos por a tende su Excelencia Minister di Energia papia di e extencion di e parke di molina di biento na Rincon y tambe di mas energia solar y e ta papia manera un cos cu ta un “switch” bo ta flip y e extra molina di biento y e extra energia solar lo funciona perfectamente.
Nos ilustre director di Utilities Aruba N.V. ta papia di cu N.V. ELMAR, banda di WEB Aruba NV, tambe tin un concesion pa produci coriente. Esey ta corecto. WEB y ELMAR, tur dos, tin concesion pa por produci coriente, pero Utilities Aruba NV NO TIN tal concesion ni permiso legal pa produci ni distribui coriente.
Awo e pregunta ta, y ta keda: Si Utilities Aruba NV NO TIN un concesion ni permiso pa produci coriente e ora pakico, cueste loke cueste, Utilities Aruba NV kier lidera e Expression of Interest (EOI) di e expansion di molina di biento na Rincon? Utilities Aruba NV no tin licencia pa produci ni distribui coriente y tampoco pa haci ningun actividad ni iniciativa comercial cu ta encera compra of produccion of distribucion di coriente.
Pero, NO MATTER WHAT, ta Utilities Aruba NV MESTER lidera e EOI aki di molina di biento y lagando e compania cu tin tur experticio, experiencia, y recursonan pa haci tal destaho na un manera profesional y obhetivo, esta WEB, keda sinta un banda ta keinta banki. Pakico no ta laga e companianan cu tin e concesion pa produci coriente lidera e EOI aki? Utilities Aruba NV, cu sosten di Gobierno di Aruba, ta trapa flagrantemente riba e Good Corporate Governance Code cu zowel Utilities Aruba NV y Gobierno di Aruba ta bati riba nan pecho y ta bisa di ta pone na “prome lugar” den e cuadro di “integridad” di gobernacion.
Cu tur respect pa e director di Utilities Aruba NV, pero ta kico e sa di e materia di produci coriente cu molina di biento, zowel comercial como tecnico? Net
net nada. Nos ministro di energia y nos director di Utilities Aruba NV ta pinta un ‘picture’ masha bunita y ta papia masha hopi sin bisa algo cu ta make sense, y asina ta tira santo den pueblo su wowo.
VWI, e asociacion di staff y profesionalnan di WEB, no ta contra produci coriente cu mas molina di biento.
VWI no ta contra produci coriente cu mas energia solar. Al contrario, manera ta conoci caba, e strategia di WEB desde 2014 ta inclui mas energia di biento y mas energia solar. Pero, esaki tin cu ser plania y ehecuta na un manera tecnicamente y comercialmente responsabel y prudente sin metemento y interesnan netamente politico den e desaroyo di esaki.
Futuro energetico di nos pais no ta un wega di mucha of un topico pa amateurnan politico (no ta porta di cua partido), of nan compinchinan, bin mete den dje. Laga e materia complica aki pa profesionalnan den e materia cu sa, y cu TUR dia ta traha cu, y den, e materia aki.
Un biaha mas: Utilities Aruba NV no tin concesion ni permiso legal pa pone un destaho di tal indole riba su nomber. E tal “Utilities Group” cu ta ser menciona no ta existi manera un entidad legal. Laga tal destaho pa e compania cu sa di e materia y di cual nan profesion ta encera projectonan energetico grandi di tal indole.
E conferencia di prensa di ayera tabata uno hopi zwak y bashi den contenido. Cu Utilities Aruba NV, cueste loke cueste, kier pone e EOI aki riba su nomber y cu ta Utilities Aruba NV tin e “final word” den escohe cua compania ta bin sinta na mesa pa negocia un PPA di molina di biento, no ta normal, ta bay contra tur bon gobernacion, y ta duna di pensa riba posibel cosnan sumamente preocupante.
E cos aki ta hole un otro LNGstyle contract y cu un otro Non-Disclosure Agreement (NDA) geplak su tras! Dus, ZERO transparencia! Manera e Hulandesnan ta bisa: “mensen, waar zijn jullie nou alweer mee bezig?”
Directiva General di VWI. Vereniging van Werknemers met een Individuele Arbeidsovereenkomst in dienst van de Water- en Energiebedrijf Aruba (W.E.B.) N.V. (de VWI-Vereniging)
