Minister Rocco Tjon ta recapitula:
ORANJESTAD (AAN) – Recapitulando riba tur e iniciativanan prome cu yega na e Campaña Nacional contra Abuso di Mucha, Minister di Husticia, señor Rocco Tjon, a bisa lo siguiente:
“Mi ta kere cu ta importante tambe pa recapitula tur e diferente iniciativanan cu ya caba a wordo tuma door di Gabinete Wever-Croes, pa loke ta trata e topico aki. Manera ta conoci algun tempo atras, Parlamento di Aruba a aproba y a aumenta e castigo maximo, cu tin pa e delitonan aki, muy en particular ora ta trata abuso sexual di mucha.
A introduci programanan, manera Codigo di Proteccion y Signs of Safety, cu lo sigui wordo expande den e diferente organizacionnan, pues practicamente den full e cadena. A percura pa certifica tur nos agentenan policial, pa asina nan por acoge na e normanan pa loke ta trata investigacionnan cu ta wordo conduci, pero tambe a haci e escogencia pa mesora envolve diferente psicologo den full e cadena ”, e dignatario a señala.
E mandatario a agrega cu, manera ta conoci, a busca tur e material pa ekipa e sala di interogacion, segun standardnan adecua. Ministerio Publico ya caba a emiti lineanan legal nobo pa loke ta trata con pa atende cu casonan di abuso sexual.
“Esaki ta hopi importante, pasobra ora bo reuni cu tur e stakeholders, Ministerio Publico, e teamnan investigativo, Orden di Abogado y tambe cu Gerecht, nan tur ta bisa bo cu pa un persona haya un castigo halto, ta hopi importante pa e investigacion cu nan ta conduci, ta uno hermeticamente cera. Pesey ta inverti tambe, den e aspectonan aki”, Minister di Husticia a subraya.
E dignatario a señala cu “Family Justice Center” ya caba ta den pleno ehecucion, e parti infrastructural ta bay keda cla dentro di poco, y dialuna el a reuni cu e docter di Aruba cu ta siguiendo e opleiding na Hulanda, pa loke ta e parti medico-forensico, y esaki obviamente tambe ta bay ta di valor agrega.
E mandatario a splica cu, cu esaki ta trata di atende cu e parti represivo pero tambe ta cu a base di e proyecto y e Campaña Nacional cu ta inicia Diaranzon, ta atende tambe cu e parti di prevencion.
