Usuarionan di e kiosconan na Welcome Plaza cu accion di protesta un bez mas

Durante mas di 4 aña no ta haya oido di gobierno:

ORANJESTAD (AAN) – Usuarionan di e kiosconan na Welcome Plaza, unda nan ta bende nan productonan, ya pa cuater aña ta pasando den un situacion fastioso, unda por ehemplo, no tin baño, entre otro aspectonan cu mester di atencion.

Dialuna mainta nan a bin hunto den un protesta dilanti oficina di gobierno, pa wak si nan haya oido di un representante di gobierno.

Lia Maldonado a comenta na prensa, cu un bez mas nan ta dilanti oficina di gobierno wak si nan por combersa cu un representante di gobierno pa mira si di un vez pa tur, nan por yega na un acuerdo y keda cla cu Welcome Plaza.

Nan ta bayendo pa cuater aña y mey cu nan ta den e mesun situacion y nan a yega na un fase cu nan a kere cu nan ta kedando cla, pero tur cos a bolbe cay na awa y dialuna nan a bolbe manifesta cu mitad di e personanan cu tin kiosco eynan, y demostra nan mal contento cu nan no ta haya ni un persona pa scucha nan, pa nan yega na un solucion na e problema cu nan tin, pero no ta hayando di infrastructura, ningun hende cu ken por keda cla.

Di parti di finanzas si nan ta trahando y tur hende a haya cobranza di full aña 21 completo y tambe di 2022. E malcontento ta cu nunca nan a keda cla cu locual ta e huur; nan no tin preto riba blanco kico nan mester paga durante e aña di pandemia, no tin e areglo di e bañonan, pues tur loke nan no tabata tin for di prome dia, falta ainda. Nada a cambia!

Maldonado a splica cu e Welcome Plaza ta cay bao di Departamento di Infrastructura y Planificacion (DIP) cu ta bao Minister di Infrastructura.

El a menciona cu aña pasa ora nan a bin dilanti Oficina di Gobierno, a haya un persona cu enberdad a scucha nan, y a yega leu cune. Pero ora nan a kere cu nan ta bay keda cla gobierno a cay, y despues di esey nan a keda sin solucion atrobe.

Nan no ta hayando contesta riba ningun di e cartanan cu nan a manda pa gobierno y tur nan peticionnan ta den lashi. E bañonan despues di e pandemia no tin awa ni coriente, kiermen no por ta den uso. Aworaki, fuera di tur e problemanan existente tin un reto extra, y esaki ta cu desconocidonan ta kibrando e kiosconan anochi.

Tres kiosco a wordo kibra y mercancia a wordo horta, y aworaki entre tur e comerciantenan aki nan ta uniendo forza pa paga un security pa cuida e lugar anochi. Ta suppose cu den nan contrato cu nan ta paga, e seguridad tabata inclui pero nada di esaki ta al caso. Asina Lia Maldonado a señala.