ORANJESTAD (AAN): For di e Diadomingo anochi cu a corona Miss Universe 2021, Andrea Meza di Mexico,
no a stop cu comentario y pa colmo polemica riba social media.
Prome a circula un informacion cu prome cu Andrea a participa den un certamen di beyeza, cu ya caba e tabata casa, y esaki lo a viola e reglanan di e organizadornan. E opinion aki a cuminza circula despues cu un potret a leak unda bo ta mira su supuesto matrimonio, unda e ta bisti na blanco y ta pose cu su casa.
Riba esaki, e cargado di corona di Miss Universe 2021 mes a bin desmenti e rumornan, sigurando cu ta trata di un sesion di potret, unda el a participa como modelo.
Despues di esey, hopi a cuminza remarca riba Internet cu e Trahe di Gala cu Andrea Meza a usa pa e anochi final, tabata un copia sin autorizacion di e diseñador mexicano Lenin.
Y si esey no ta tur, awor ta hopi persona riba Internet ta vincula Miss Universe cu e cantante mexicano Ana Gabriel, bisando cu por existi un vinculo di sanger entre e dos Mexicanonan aki, esta di mama y yiu.
Recientemente e canal di YouTube ‘Suavesuave suavecito’ a publica un video unda bo ta tende un voz patras di camera ta duna detaye. Segun e videoclip. Andrea Meza lo a admiti cu e ta yiu muher biologico di e cantante legendario, pero cu Ana a pone e baby pa wordo adopta.
Encuanto tur e speculacion aki, e periodista Claudia de Icaza a desmenti e informacion aki. El a djis bisa cu Ana Gabriel nunca a haya yiu, y cu e sa esey di bon fuente. E no sa si ta invento of confusion, pero hecho ta cu Ana Gabriel nunca tabatin yiu biologico.
