ORANJESTAD (AAN) — Rayenne Hernandez, funcionario di Union di Organizacionnan Cultural Arubano “UNOCA”, hunto cu tres miembro mas di e Fundacion, a reuni cu Formador Evelyn Wever-Croes, den e contexto di formacion di gobierno.
Rayenne Hernandez a duna su declaracion den conferencia di prensa, despues di e encuentro y a splica cu UNOCA a trece dilanti e tres puntonan cu mas ta concerni e institucion aki, entre otro e asunto di subsidio cu ultimo añanan a wordo reduci, locual ta crea efectonan negativo pa loke ta trata e inversionnan cu ta wordo haci den sector cultural. Otro punto, cu ta e aspecto di mas importante pa pidi atencion di e potencial gobierno nobo, Hernandez a subraya, ta cu UNOCA kier pone enfasis riba educacion cultural.
E dama a señala cu educacion cultural, e ultimo añanan aki, semper ta wordo treci dilanti como un parti importante pa loke ta e desaroyo cultural di Aruba, pero nan no ta mira cu suficiente accion ta wordo tuma den e direccion di educacion cultural.
“Nos como UNOCA kier wak cultura den loke ta enseñanza formal di Kleuter te educacion avanza y Universidad. Pero nos kier esaki un tiki mas den educacion informal, ora cu ta papia di “Buitenschoolse Activiteiten” unda te adultonan ta busca informacion cultural, arte, etc. Dus, esaki ta un parti cu nos a trece dilanti na e Formador. E ultimo punto cu nos a trece dilanti ta e posibilidad pa UNOCA por busca mas fondonan sea di Hulanda, Union Europeo, fondonan comercial, pa asina nos por yuda engrandece e fondonan cu nos tin disponible, pa UNOCA por sigui inverti den e sector cultural, mirando cu nos tin caba infrastructura pa duna fondo y subsidia proyectonan cultural, nos kier sigui sondea e posibilidadnan aki, y kizas hunto cu e gobierno nobo, nos por logra esaki”, señora Rayenne Hernandez a duna di conoce.
