ORANJESTAD (AAN) – Biblioteca Nacional Aruba a yama un conferencia di prensa, den cual señora Josmar Sneek a elabora tocante e Festival di Buki pa Mucha 2021, cu lo ta den forma virtual.
Sneek a comparti cu prensa e hecho cu e aña aki Biblioteca Nacional ta celebrando e di 29 aña di e Festival di Buki pa Mucha.
“Manera nos tur sa, claro cu esaki ta nos ‘core business’ y locual cu nos kier ta e promocion di lesamento. E aña aki nos tin como tema: ‘Ta loke bo kier ta’, y e lema ta: ‘Ora mi bira grandi mi kier ta…’ y cada mucha por yene.
E aña aki nos tin diesdos participante (autor) y contador di cuenta for di Aruba, Curaçao y Hulanda. Di Hulanda nos tin Lizzy van Pelt, Annemarie Jongbloed, Petra Hezzen cu ta e ilustrador di e buki cu nos ta regala tur aña na e muchanan, Jeroen Hoogerwerf y Evelien van Dort. For di Curaçao nos tin Mercee Doran y Tio Ali, cu nos tur conoce. Di Aruba nos tin Roby Solognier, cu ta ilustrador tambe di e buki, Lorena Boekhoudt-Almary, Maribelle Arends, James Ocalia y sin duda algun Sarah-Quita Offringa, cu ta un honor pa nos tine e aña aki, participando den e Festival di Buki pa Mucha”, Josmar a relata.
Josmar Sneek a duna di conoce cu e aña aki e presentacionnan lo tuma lugar den e studio di Biblioteca mes, y si algun autor kier paafo lo haci esey tambe.
E Festival ta cuminza dia 8 pa 12 di November (clausura), y e apertura mes lo ta dia 5, e lo wordo graba pa Tele Aruba y pasa tambe. E apertura, dia 5 di November, lo tuma lugar via Tele Aruba canal 23, posiblemente pa 6 or of 6.30 or di atardi.
Scolnan ta bay participa den forma virtual, mescos cu aña pasa, y tambe via tur e social media disponible, Josmar a señala.
Josmar Sneek a menciona tambe cu lo bay tin un tayer di trabao virtual e aña aki, mescos cu aña pasa y cu lo ta na encargo di Mirto Lacle.
E presentadornan ta bay ta Richard Dabian y Rosita Abreu. E muchanan por wak e festival durante e siman y despues di e siman tambe.
Seguidamente, Giselle Lacle, miembro di e Comision di Festival di Buki pa Mucha, a reitera cu esaki ta e di 29 aña cu e festival aki ta tumando lugar, y a duna di conoce cu e aña aki e sponsor principal ta WEB Aruba NV, cual lo haya 50 buki di regalo cu nan ta bay parti entre peuterschool y traimerdianan, cu no ta haya buki di Biblioteca Nacional.
Giselle ta encarga tambe cu e actividadnan di merdia, cu ta wordo organiza di dia 8 pa 11 di November, cu tambe lo wordo presenta na Tele Aruba.
Tur dia lo tin un autor presente cu e muchanan por wak via television.
