ORANJESTAD (AAN): Recientemente, Minister Endy Croes a reuni cu Sr. John Wardlaw, Señora Jo-Anne Croes, Dr. Andy Gillentine y Dean Sue-Ann Lee. Unda a trata diferente curso y proyectonan.
Dia 31 di januari, Universidad di Aruba y University of South Carolina a inicia cu e curso di Sports Management. E curso ta worde duna door di University of South Carolina pa dos profesor, esta dr. Andy Gillentine y dr. Stephen L. Shapiro.
E profesornan ta experto ariba e.o. College of Hospitality, Retail and Sport Management. Banda di esaki, Universidad di Aruba y University of South Carolina ta planificando pa inicia den e luna di juli of augustus cu Masters den Sports Management.
Durante e reunion a informa Mandatario di Deporte cu Universidad di Aruba ta preparando cuater investigacion riba e tema di deporte.
E investigacion aki ta bay den diferente parti:
- Lo evalua e balor cu deporte tin pa comunidad di Aruba;
- Inventarisacion y evaluacion di facilidadnan deportivo na Aruba.
- Evalua e posibilidad pa torneonan di softball y baseball pa hoben.
- Evalua e deportenan cu por engrandece ‘sport tourism’ na Aruba.
A base di e data cu colecta pa medio di investigacion, ta tuma decision di e direccion cu mester tuma y asina sigui contribui na e desaroyo di deporte na Aruba. Por ultimo, a extende un invitacion na Minister Endy Croes pa bishita University of South Carolina.
