Yegando na climax di carnaval e fin di siman aki:
ORANJESTAD (AAN) – Den conferencia di prensa di fraccion di Partido Movimento Electoral di Pueblo (MEP), parlamentario Ricky Hoek a hiba palabra, y a cuminza cu un yamada na comunidad.
E parlamentario a expresa cu Aruba ta drentando den e climax di su carnaval 69 y pa pueblo di Aruba completo, esaki ta un celebracion grandi, unda ta celebra nan cultura, tradicion y musica cu comunidad ta goza tanto asina, ya pa 69 aña caba.
“Mi yamado como politico, como parlamentario di Pais Aruba, na pueblo henter ta pa laga nos ta conciente y ban goza e fin di siman aki, concientemente, di nos dushi carnaval.
Pa mayornan, tene precaucion pa muchanan cu ta bay atende e carnaval. Por fabor, pa muchanan cu ta bao di dos, tres aña, laga nan na cas, cerca un familiar, un bisiña of na un crèche. Tin crèchenan special cu ta tuma e muchanan aki, durante e periodo di carnaval”, e parlamentario a remarca.
Mayornan ta e role model pa nos muchanan, y tambe pa e funcionnan importante cu nan tin den comunidad, e ta bisa nan pa disfruta sana, decente y concientemente di carnaval, pa asina demostra cu carnaval di Aruba ta di un nivel halto y unico den Caribe y na mundo.
“Haci uso di alcohol y droga lo minimo posible y mas conciente; uza, bebe y come na midi, pasobra tin pa tur dia. E fin di siman aki ta pa nos goza grandemente cu nos famia, nos amigonan y cu pueblo henter. Den e aña di union y positivismo mi ta kere cu esaki ta e manera cu nos ta bay celebra grandemente y mustra cu enberdad nos ta para riba un aña di union y positivismo”, e Parlamentario a señala.
Pa mucha, hoben y adultonan Hoek ta haci un yamada pa uza earplugs durante e paradanan, mirando cu musica hopi biaha ta duro y tin gruponan, clubnan di servicio y damanan cu ta pasa bende earplugs, banda di caminda, prome cu e paradanan y haci contribucion na esaki. Un contribucion di un of dos florin ta yuda e damanan di clubnan di servicio pa despues nan ta duna bek na comunidad y asina un ta yuda otro.
Tambe e ta sugeri hoben y adulto cu mester di informacion tocante sexualidad, acerca e diferente fundacionnan cu tin pa haci esaki, entre otro Wit Gele Kruis y Famia Planea.
Ademas e ta pidi pueblo pa come bon, sano y balansa y bebe likido pa asina por goza optimalmente di Aruba su dushi carnaval. Finalmente, el a expresa palabranan di elogio na KPA cu a sa di haci un bon trabao durante e temporada di carnaval aki cu e capacidad cu nan tin, poniendo regla y disciplina den nos comunidad.
