Universidad di Aruba a celebra “World Teacher’s Day” cu e tema: “Teachers: Voice of Change”

Sue Ann Lee, Decano Facultad Hospitalidad y Turismo:

ORANJESTAD (AAN) – Universidad di Aruba a celebra Dia di Maestro recientemente. Den entrevista cu DIARIO, Decano di Facultad di Hospital y Turismo, señora Sue Ann Lee, a comparti cu comunidad, cu Universidad di Aruba a celebra nan docentenan den e contexto di “World Teacher’s Day”, decreta pa UNESCO, oficialmente, riba dia 5 di October.

Decano Lee a expresa cu nan a duna e docentenan un momento di aprecio y gratitud, pa e trabao cu nan ta eherciendo.

E dama a menciona cu nan tin mas di 50 docente y basta part timers tambe, cu ta bin di e sector di industria y ta duna dos les pa siman. Entre docentenan di tempo completo y part timers tin mas of menos 80.

Universidad di Aruba, ultimamente a crece hopi, pareu cu e demanda cu tin den comunidad, den lo cual Universidad por brinda pa un carera profesional den futuro.

“Y na mesun momento pa nos tambe ta un crecemento pasobra nos ta purbando di mantene e calidad, unda cu nos tin e departamento di ‘Quality’, cu ta yuda nos tambe constantemente pa haya training, pa nos ta riba un nivel no solamente riba e parti di bo vak kunde, unda tin hendenan ta bin cu nan parti di tecnica, otro ta bin cu e parti di business, e parti huridico, pero tambe e manera con pa duna les. Pues, bo no ta duna les den un- dos- tres tampoco, pero mester pasa den full e trayecto ey di con pa duna les, con pa maneha un classroom, esey ta un parti importante, y scucha bek di e docentenan kico ta importante pa nan”, Lee a expresa, refiriendo na e tema di e dia aki cu tabata “Teachers: Voice of change”, pasobra nan tame a trece cambio den e futuro di studiantenan, ta trece cambio den educacion aki na Aruba.

“Kiermen, e ta un rol importante pasobra loke nan ta prepara na Universidad ta locual ta bay bek den comunidad pa traha”, Decano Sue Ann Lee a señala.