United Farmers Aruba cla pa elegi un directiva nobo

Diego Acevedo ta splica:

ORANJESTAD (AAN) — Den entrevista cu DIARIO, señor Diego Acevedo di United Farmers Aruba, el a duna di conoce cu e ultimo lunanan nan ta bezig cu un renovacion di e Organizacion cu e meta di instala un directiva nobo, bira mas activo y acerca e miembronan mas.

            El a menciona cu nan a lanta un website nobo “united farmers.aw” na unda nan kier cuminza haya mas contacto cu nan miembronan, duna nan informacion, e documentonan cu nan a haya, duna mas informacion tocante e posibilidadnan cu tin na Aruba pa planta, y tur e farmernan cu por yuda e sector primario crece.

            E retonan pa e organizacion aki ta keda existi, manera haya suficiente tereno, suministro di awa y coriente, y nan ta spera di haya un bon relaciona cu e gobiernonan cu lo bin, esun despues di e siguiente eleccion y esnan cu lo sigui den futuro.

            “Un bon relacion pa haya tereno, pa deal cu tur e problemanan cu nos tin cu coriente, e problema di awa ta bayendo un tiki miho, pero toch e lo keda un reto semper pa e diferente sorto di agricultornan cu por tin na Aruba, esnan cu tey y esnan cu lo bin tambe”, Acevedo a menciona.

            El a bisa cu nan ta mira cu e sector ta creciendo, y cada bez tin mas y mas agricultor comercial, y tambe cu tecnologia ta hunga un rol grandi.

            “Cierto regulacion cu tin na Aruba, belasting, invoerrechten, y con pa deal cu structuranan cu nos mester pone riba huur ground, por ehemplo, con nos por moderniza tur e sistema pa hendenan cu kier drenta den e sector” Acevedo a señala. 

ELECCION DIRECTIVA NOBO:

            Diego Acevedo a informa cu otro siman, Diaranson 13, nan tin un reunion di asociacion pa tur e miembronan. “Nos tabata tin un meeting un luna y mey pasa, na unda nos a duna informacion kico e futuro di e organizacion lo ta. Awo nos ta yamando e miembronan cu a dicidi di drenta den e organizacion tambe, pa nos hacie mas fuerte, traha e structura di un board nobo, cu hende cu kier hiba e sector dilanti, pa nos por tin miho discusion cu Gobierno, cu Santa Rosa, y cu tur e stakeholders pa nos crece e sector”, Diego Acevedo a subraya.

            E reunion aki lo tuma lugar na Universidad di Aruba, e espacio tey y e lo tuma lugar Diaranson otro siman dia 13 di November, pa 7 or di anochi, den cual lo elegi un directiva nobo.

            El a reitera cu e meta central di e encuentro aki ta pa elegi e directiva nobo, y pa haya mas contacto cu e miembronan y despues defini kico ta e problemanan cu United Farmer ta confronta.