ORANJESTAD (AAN): E asociacion local di UFA (United Farmers Aruba Association) cu orguyo a laga sa cu nan tin hopi miembro nobo,
un directiva completamente nobo, y algun plan emocionante pa futuro.
Tabata na final di 2024, cu UFA a tene un Asamblea General di miembronan, durante cual algun decision clave a wordo tuma pa guia e asociacion rumbo pa un capitulo nobo. Poco prome cu e reunion di dia 20 di November, UFA a convoca pa miembronan nobo acudi. E reaccion tabata hopi entusiasma, y asina hopi miembro nobo a uni.
Asociacion UFA awor tin 32 miembro. E miembronan cu ta participa ta varia di agricultornan tradicional y profesional di permacultura cu ta usa sistemanan di food forest traha cu principionan di Agroforesteria Sintropico, y tambe agricultornan trahando cu greenhouse chikito y grandi, sistemanan hydroponic, apicultornan encarga cu Bij, criadornan di animal, y cultiuvadornan gourmet di paddenstoel (mushroom).
E mezcla inspirador di conocemento ta subraya e dedicacion di UFA pa bin cu mas colaboracion y comparti conocemento dentro di e comunidad agricultural.
Directiva nobo: Mayoria di e miembronan tabata presente na e ultimo reunion di directiva y a participa activamente. E reunion a cuminza cu un mocion pa disolve e directiva saliente. Despues di esey, a eligi un directiva nobo.
Diego Acevedo di Happyponics a keda eligi como President.
Rose Barros di Living Soil Aruba a tuma e doble puesto di Vice-President y Secretario, contribuyendo su experticio den agroforesteria sintropico, y proyectonan di hardin di cuminda pa comunidad.
Rachell Peterson di Farm a Cure Fungi, conoci pa su cultivo di mushroom gourmet, a keda eligi como tercer miembro di directiva, y ta cubriendo e puesto di Tesorero tambe.
Awor cu tin tres di e cinco puestonan di directiva cubri, ainda tin dos puesto habri cu por wordo apunta den e siguiente reunion general di miembronan. Esaki ta un chens pa mas persona apasiona cu agricultura por drenta den un rol di liderato y yuda forma e direccion di UFA.
Ademas di e cambionan aki, UFA a renoba su website tambe, como cu e ta un fuente importante di informacion pa miembronan keda informa. E tin awor mas pagina nobo, manera un data bank y tambe espacio pa hendenan aplica pa bira miembro. E website ta:
Asociacion UFA ta spera cu nan por yuda tanto miembro como no-miembronan pa nan keda up-to-date cu tur desaroyo.
