Premier Wever-Croes a laga sa:
*Gobierno lo haya 13.5 miyon Euro pa finalisa cu proceso
ORANJESTAD (AAN): Falta di personal ta un problema serio den henter gobierno. Asina Prome Minister Evelyn Wever-Croes a señala. El a bisa cu den e siman aki, el a haya di Departamento di Recursonan Humano, DRH, informacion cu dia cu gabinete Wever-Croes a drenta den gobierno tabata tin 4500 ambtenaar registra den e sistema di pago, esaki na 2017.
El a agrega cu e siman aki, a yega na e punto mas abao cu 3499 ambtenaar den servicio di Gobierno. Kiermen, un reduccion di 1000 empleado publico menos.
E mandatario a sigui bisa cu no solamente ta papiando di 1000, pasobra a bay mas y a bin algun acerca, pero per saldo, el a baha cu mas di 1000.
A enfatisa cu esaki ta un di e metanan cu Hulanda a impone na 2018 caba. Kiermen a logra e meta ey, pero e dolor ta cu e departamentonan a keda cu menos personal y cu atraso.
Aworaki e meta ta pa no hisa e cantidad di personal, pero si caba cu e atrasonan y esey si ta un reto complica.
Pa loke ta e digitalisacion, el a bisa cu no tin placa pa bay ful den esaki asina lihe. Den cuadro di Landspakket, algun proceso a wordo tuma over, no di DIP, no di DOW, ni di departamentonan di infrastructura. Belasting ta haya mas atencion, Finansas tambe den cuadro di Landspakket, pero si a haya e bon noticia cu Union Europeo a aproba e plan di e-government.
Esaki kiermen cu gobierno lo haya 13.5 miyon Euro pa caba cu ful e proceso di e-Government. E siman aki a reuni cu embahador di Union Europeo y el a bisa cu esaki ta den e fase final y cu e ta kere cu pa november ta bay haya e documentonan final.
A bisa cu pa 2024 e placa ta bay cuminsa drenta y e ora ey lo over na keda cla. E departamentonan di infrastructura ta esunnan cu ta bay haya prioridad. No sa ainda si pa 2024 nan ta bay keda cla pero pa 2024 e proceso di e-Government ta bay inicia.
E suma aki ta un placa cu ta bay drenta den caha di gobierno y ta bay den presupuesto pa Parlamento control'e y no ta un placa cu ta hay'e den un 'shot', Wever-Croes a splica.
"Pa falta di personal, falta di placa, tur e retonan aki nos a cay hopi atras", e mandatario a finalisa bisando.
