ORANJESTAD (AAN): Algo cu a hala hopi atencion en siman cu ta cabando, ta e hecho cu e compania estableci na Spaña,
esta ACCIONA Energía a anuncia e firmamento di un MOU hunto cu companianan di energia di Aruba pa traha hunto ariba desaroyo di un Green Hydrogen Valley na e Isla di Aruba.
ACCIONA Energía lo traha hunto cu Gobierno di Aruba su entidadnan di energia pa desaroya, traha y opera un planta di hidrogeno berde pa un proyecto di energia renobabel sostenibel. E electricidad genera lo ser uza pa produci primeramente hidrogeno berde y locual resta lo ser uza internamente pa reduci uzo di combustibel fosil importa. E proyecto aki lo haci uzo di e tereno cu actualmente ta pertenece na Gobierno su entidad, Refineria di Aruba N.V., awa lo worde suministra pa WEB Aruba, mientras cu Elmar lo maneha distribucion y transmision di energia den e red.
ACCIONA Energía lo brinda sosten na Gobierno di Aruba su entidadnan di energia cu e implementacion di e infrastructura necesario pa traha un ecosistema di hidrogeno renobabel riba e isla y explora uzo suplementario pa e hidrogeno berde incluyendo e oportunidadnan di exporta.
Pa medio di e proyecto transformado aki, Gobierno di Aruba y su entidadnan di energia ta prepara pa fortalece nan compromiso pa haya independencia di energia. Pais Aruba tin como meta pa cambia for di un fuente tradicional di energia, y pone un meta ambicioso pa establece energia renobabel como fuente primario pa aña 2050.
ACCIONA Energía ta den bon posicion pa traha hunto cu Gobierno di Aruba y su entidadnan di Energia riba e proyecto innovativo aki y contribui na decarbonizacion di e isla cu su vision di un futuro di energia renobabel.
Na Maart 2022, ACCIONA Energía a inaugura su proyecto yama “Power to Green Hydrogen Mallorca”, cual ta inclui e construccion di e planta electrolysis, e desaroyo di dos planta fotovoltaiko cu ta mantene e planta electrolysis, y tambe un stacion di refuel hidrogeno berde na e isla. Ademas, e compania ta progresando na e desaroyo di un planta di produccion di hidrogeno berde na escala industrial na Navarra, Spaña, cu lo cuminsa genera hidrogeno berde na 2025.
Cu e MOU aki, ACCIONA Energía y Gobierno di Aruba ta cumisa un colaboracion pa establece un ecosistema di hidrogeno renobabel pa Aruba cu no ta solamente pa transforma industrianan local, pero tambe pa extende e alcance pa e region di Caribe y mas aleu.
