Unidad di cacho ta di vital importancia pa siguridad di Prison KIA

Conoci como ‘BOT-K9’

ORANJESTAD (AAN): Den fin di siman, Minister Dowers a reuni cu personal di BOT-K9, e unidad di cacho encarga cu siguridad den KIA.

   Mirando e falta di atencion na e personal durante e ultimo gobierno, Minister di Husticia Arthur Dowers a haya necesario pa sinta na mesa y scucha e preocupacionnan di e empleadonan di e organizacion cu defacto e mandatario di husticia mes a funda na final di 2011.

   Durante e reunion, e personal a expresa cu tin falta di autonan di trabao pa por haci nan trabao diario efectivamente. Sin e recursonan logistico necesario, e capacidad operacional di e unidad ta keda limita, algo cu ta afecta directamente e nivel di siguridad.

   Ademas, tin necesidad pa mas cacho di K9 nobo. Actualmente e unidad di BOT-K9 ta opera cu 9 cacho specialisa di K-9, pero tin necesidad pa mas. Algun di e cachonan den funcion ta yegando nan edad di pensioen y pronto lo sali for di servicio. Un planificacion structural pa reemplaso ta esencial pa mantene continuidad y efectividad den e unidad.

   E miembronan di BOT-K9 tambe a comparti otro retonan relaciona cu nan trabao diario, incluyendo gastonan adicional di mantencion pa cada cacho. Cuido, entrenamento y bienestar di e cachonan aki ta un responsabilidad serio y un inversion directo den siguridad.

   BOT-K9 ta consisti di un grupo dinamico y motiva di agente cu ta dedica na nan trabao. Nan trabao ta di vital importancia pa mantene siguridad den KIA y proteha tanto personal cu ta traha den KIA mes, pero tambe e bishitante.

   Pa Minister Dowers, e tabata un momento importante pa sinta cu e grupo di BOT-K9 y a indica cu su ekipo lo studia e puntonan presenta y lo tuma accion pa fortifica e unidad di manera sostenibel.