Unidad Compania di Ehercito di Ministerio di Defensa den Caribe ta haciendo su rotacion

ORANJESTAD (AAN): Informacion for di Corsou ta indica cu durante un ceremonia militar riba djaluna mainta, 2 di mart 2026,

Kompania Rotashon 50 a entrega su tareanan na e siguiente unidad, Rotacion 51. E Comandante nobo entrante, Capitan Marnix, a tuma e mando for di su predecesor durante un entrega di rema.

    Despues di cuater luna intensivo den Caribe, Capitan Roderik ta wak bek cu satisfaccion riba e colaboracion y entrenamento di Charlie/Tijger Company. E unidad a tene varios sesion di entrenamento riba e varios islanan, hunto cu un elemento medico. Tabata un oportunidad unico pa e unidad train den e clima tropical aki na Aruba, Bonaire, y Corsou.  Asina a duna e peloton nan aki e oportunidad pa conduci entrenamento tactico y desaroya habilidadnan specialisa.

    E tereno di tiro na Curaçao ta ofrece e oportunidad pa conduci ehercicionan di candela bibo integra cu morteronan y sniper, sosteni pa sistemanan no-tripula y Drone. Tambe nan por a colabora cu militarnan di Corsou y Wardacosta. Tabata remarcabel pa mira con, apesar di diferencianan den antecedentenan y metodonan di trabao, nan por a contribui conhuntamente na seguridad y stabilidad.

   Compania Bravo “Bull” ta cuminsa cu su di cinco rotacion den Region Caribe. Capitan Marnix ta ancioso pa traha y entrena cu su unidad den e region.  Como parti di Batayon 11 di Infanteria, ‘Garderegiment Grenadiers en Jagers’, nan ta wordo desplega normalmente for di Helicopter of cu parachute, dentro di e tres tareanan principal di e forsa arma. E compania ta provee poder di combate di calidad halto for di laira pa riba tera. Como un compania den West, e enfasis ta principalmente riba operacionnan na pia. E unidad lo wordo reforsa pa e proximo 4½ luna cu e capacidad medico di Compania Medico 11. Ademas di ta prepara pa y realiza misionnan pa CZMCARIB, e enfoke ta riba un programa di entrenamento interno pa prepara e unidad.

   E clima y medio ambiente di e Region di Caribe di Reino ta ofrece un oportunidad excelente pa traha riba e desaroyo fisico y mental, liderato, y resiliencia di personal. Capitan Marnix y su team ta wak padilanti pa colabora cu partnernan di seguridad local y spera cu e lo ta un contact agradabel y un periodo util door di uza varios oportunidad di entrenamento.

    Ehercito Real di Hulanda tin un compania permanente den Caribe. E unidad aki, bao di mando di CZMCARIB, por wordo desplega pa un variedad di tarea. Durante e proximo cuater lunanan, e compania lo train na Aruba, Bonaire, y Corsou.