Rabbi Zeilicovich ta amplia tocante su trayectoria y su Doctorado Honorario:
ORANJESTAD (AAN)—Siguiendo cu e entrevista cu Rabbi Baruch Zeilicovich, di Beth Israel Aruba, el a conta mas di su experiencia na Puerto Rico, na unda el a bay eherce su mision comunitario, prome cu el a bay Merca, na Fort Worth Texas, na 1994.
Manera el a comenta den un prome articulo, na Puerto Rico el a traha cu Gobernador y e Senador di Isla, unda el a formula un programa extenso pa e scolnan tocante e violencia na television, cual ainda ta vigente, y a realiza un video hopi interesante y bunita, di mucha y hobennan mirando dilanti pantaya di television hopi acto di violencia, y con esaki tin un impacto despues den e sociedad.
“Bon, nos a traha hustamente pa minimiza e impacto di e violencia aki den television, y nos a logra e ‘rate the rates programs’ dirigi na mucha no mas chikito cu 13 aña. Despues mi a bay Ferland New Jersey, unda mi a keda diez aña. Eynan mi a haci un trabao inter-confesional bastante grandi cu tur e Iglesianan. Y mi loke mi a ricibi ta un reconocimento na tur esaki. Mi a wordo contacta door di e Seminario Rabino Latinoamericano, pasobra nan tabata tin un ceremonia di Ordenacion Rabinico, kiermen tabata tin cuater persona cu a obtene e titulo di Rabbi, y den e mesun ceremonia e Seminario ta otorga tres Doctorado Honorario na tres Rabbi, y un di nan ta mi persona”, Rabbi Zeilicovich a relata.
Rabbi Baruch Zeilicovich tin tres aña eherciendo pa e Comunidad di Aruba, y e tin un aña mas pa completa su periodo. Pero e ta bin Aruba for di aña 1990, door cu e tin tres siman di timesharing na un di e resortnan local. “Despues di 15 aña sigui di bin Aruba Ministerio di Turismo a reconoce nos tambe, mescos cu nan ta haci cu tur esnan cu ta bin consecutivamente. Nos a ricibi e certificado di Amigonan di Aruba, kiermen cu Aruba p’ami ta un segundo hogar”, el a expresa.
Ora e caba su tempo como Rabbi na Aruba, e mester tuma un decision. Sea e ta bolbe Merca, unda su yiunan y nieto ta residencia, of kizas ta bay Israel, cual ta un posibilida. Ainda no a dicidi. “Locual si nos lo no keda sin haci ta sigui bin Aruba. Corda, mi tin tres siman cu mi no ta bay perde pasobra Aruba no djis ta un isla, e ta parti di e paradise!” Rabbi Zeilicovich a conclui.
{gallery}Aruba no ta djis un Isla, e ta e Paradise{/gallery}
