Prome Minister Evelyn Wever-Croes:
ORANJESTAD (AAN): Despues cu Parlamento a aproba Presupuesto di Pais Aruba, a keda ainda algun presupuesto chikito pa aproba. Diahuebs a trata e presupuesto di Raad van Advies pa 2022. Raad van Advies ta e organo cu ta duna conseho na Gobierno riba tur ley y cada ley cu worde trata na Parlamento ta bin cu e conseho di Raad van Advies.
Apesar di retonan financiero, pa Gobierno di Aruba ta importante pa Raad van Advies tin su presupuesto aproba pa asina nan por opera dentro di e cuadro aproba.
“Lamentablemente, tur gasto a worde corta e aña aki, sperando cu pa otro aña Raad van Advies por sigui expande e trabaonan di estudio y investigacionnan entre otro. Raad van Advies ta un organo hopi importante pa Gabinete Wever-Croes II y mi ta contento cu Parlamento unanimamente a aproba e presupuesto di Raad van Advies”, Prome Minister Evelyn Wever-Croes a expresa.
