ORANJESTAD (AAN) – Den conferencia di prensa di fraccion di MEP, Dialuna, Parlamentario Shailiny Tromp-Lee a hiba palabra, y a referi na e renovacion cu ta tumando lugar, di St. Aloysius School.
Para dilanti di school e parlamentario y su coleganan di fraccion di MEP, a tuma nota di e inicio di e trabaonan aki di renovacion di e scol.
E dama a pone acento pa bisa “ami tambe ta feliz”! El a señala cu te cu el a drenta Parlamento, no tabata tin un presupuesto, ni un reunion cu nan a atende cu DOW of Enseñanza, cu su persona no a pidi atencion pa e scol aki.
El a expresa den nomber di fraccion di MEP, cu nan ta hopi contento cu despues cu nan a aproba, den mas cu un ocacion, e fondonan necesario pa renova e scol awo, despues di tanto aña, nan ta mira cu esaki a keda cristaliza, y cu a inicia cu e trabaonan di renovacion aki.
“Pronto nos muchanan di Noord no tin cu subi bus mas y bay te Playa pa haya enseñanza, pero nan por keda den nan mesun distrito, den un edificio adecua pa nan por haya enseñanza di calidad, cu ta algo cu nos ta boga pe di hopi aña caba”, Shailiny Tromp-Lee a reitera.
El a felicita Gobierno y SKOA cu nan a sa di yega na otro, tuma e decision y cuminza cu e renovacion. El a expresa palabranan di pabien pa tur e docentenan di St. Aloysius School, y na tur e alumnonan.
