Un trahador profesional cu wowo skerpi pa detaye

ORANJESTAD (AAN): Tur luna Horacio Oduber Hospital (HOH) ta elogia un trahador kende di un forma of otro ta destaca,

y pa luna di Maart 2026 a toca turno na Euwald Cicilia. Euwald tin 3 aña ta traha na HOH como trahador di e team tecnico cu ta traha riba aparatonan medico. Ora el a drenta un supuesto reunion pa sorpresa el a mira su famia para eynan hunto cu coleganan, management y hunta di directiva. Claro cu el a ripara di biaha cu e reunion tabata dedica na dje. Cu bunita palabranan tocante e dedicacion cu e tin pa cu HOH a celebra e momento inespera y festivo aki cu nunca elo lubida.

   Euwald su nominacion basa riba e balornan TRUSTED di Hospital a wordo entrega pa su team, manager y tambe un compania externo cu a reconoce su empeño durante un proyecto grandi. E ta un berdadero teamplayer cu ta coopera cu su coleganan y ta contribui na un ambiente positivo di trabao. E ta un tecnico profesional cu semper ta cumpli y ta traha na un manera responsabel. Un trahador respetuoso cu ta comunica y scucha bon cu ta hiba na yega na resultadonan efectivo pa problemanan tecnico. Esaki semper den bon colaboracion y cu confianza.

   Euwald ta un persona practico cu no sa keha y cu tin siguridad halto como prioridad den su trabaonan. Su conocemento tecnico, su pasenshi, wowo skerpi pa detaye y capacidad pa resolve problema ta haci cu su trabaonan semper ta consistente y di calidad halto.

   Ningun trabao ta chikito of mucho grandi pe, sea ta mantencion, drecha fayo of reparacion. E ta zorg pa enfermeranan y specialista por conta riba dje pa aparatonan medico funciona manera debe ser pa sea informacion y/of diagnostico corecto di pashent. Ekipo cu Euwald ta traha mastanto riba dje ta na departamento di mucha, camber di operacion y cuido intensivo. Pa e proyecto di implementacion di HiX e tambe a percura pa tur informacion di cada aparato a wordo yena y configura den e sistema nobo. Un trabao cu a tuma hopi tempo di preparacion y dedicacion unda cu hasta e compania Hulandes ChipSoft a reconoce su balor pe team.

   Su talento y profesionalismo ta haci cu Euwald tin un tremendo balor pa su team y tambe e ta contribui di forma indirecto na e cuido di pashent y tambe Hospital. Hunta di directiva y team completo di HOH ta contento cu Euwald ta forma parti di team HOH y ta felicit’e pe bunita reconocemento como empleado di luna di maart 2026.