Como 61% di e casonan nobo na Aruba ta relata na Omicron --- Aruba ta den piek caba y sigur Januari 2022 lo ta un luna crucial --- • Awor tin 1.506 caso activo riba isla di Aruba
ORANJESTAD (AAN): Cifranan di Covid na Aruba ta birando mas y mas cada dia. Den un dia pa otro e aumento a bay den 77% y esaki ta locual ta treciendo basta preocupacion den comunidad.
Dialuna a raporta 248 caso nobo y pa diamars e cifra aki a bira 439, locual ta nifica un aumento di 191 caso den un dia.
E resumen di diamars a mustra cu 53 persona a recupera y un total di 439 caso nobo di COVID-19 a keda registra di cual 86 ta no-residente.
E cifranan aki ta representa un 'Positivity rate' bou di residentenan di 49%. E cantidad di casonan activo di COVID-19 ta 1506 y cantidad di fayecidonan relaciona cu COVID-19 ta 181. Datonan ta ilustra casonan nobo di COVID cu un averahe semanal di 204 caso pa dia y un averahe di 'positivity rate' semanal di 37% pa dia.
Actualmente na Aruba tin 6 persona interna debi na COVID di cual den ICU no tin ningun (0) persona y riba piso general tin 6.
Na Colombia tin actualmente 5 persona den ICU y ningun (0) riba piso general.
Ta importante remarca cu diamars, durante un entrevista cu vocero di Departamento di Salud, Jurette Croes, el a confirma na DIARIO cu 61% di e casonan nobo na Aruba ta relata na e variante nobo Omicron.
Tambe, por spera mirando cu e variante aki ta mas contagioso cu e cantidad lo keda subi.
Segun Croes, Aruba ta den piek caba teniendo na cuenta cu e pronostico ta uno mas intensivo cu e otro olanan cu Aruba a yega di conoce.
Por conclui cu pa Januari, e casonan lo por ta hopi mas si ta mira e cantidad di fiesta, reunion, eventonan cu tabata tin pa Pasco y cu lo sigui durante fin di aña.
Hopi hende ta sigui organisa fiesta, reunion familiar keriendo cu e situacion ta uno facil. Parce cu te hasta uzo di tapaboca no ta suficiente mas den e caso di omicron.
Algo di locual por ta sigur ta cu tin mas casonan activo rond di Aruba y ta trata akinan di e casonan di personanan cu tin sintoma y no ta bay test of di esnan cu ta test na cas y no ta raporta esaki na DVG.
Si abo tin un di sintomanan, yama bo docter di cas of solicita bo codigo pa test via e website www.arubacovid19.org, of yama 280-0101. E sintomanan ta:
- tos
- fatiga
- congestion
- verkoud
Nota: No necesariamente bo mester tin fiebre of keintura of perdida di smaak y olfato
